Жақында әлеуметтік желілерде әкімдік ғимаратына басып кіріп, кір жуып отырған әйел адамның бейнежазбасы кеңінен таралып, талқыланды. Дәл осы оқиға аталған Тұздыбастау ауылында болған еді. Бірақ бұл ешқандай күлкілі көрініс емес еді. Ауыз су түгілі тұрмысқа қажетті суға жарымаған жұрт амалсыздан осындай қадамға барғанын айтады. Ал ауылдың да, ауданның да әкімдігі бұл мәселеден хабардар екен.
Тұздыбастау ауылдық округінің әкімі Мирас Баймолдановтың айтуынша, ауылдағы ауыз су тапшылығын түбегейлі шешу үшін бірнеше бағытта жұмыс істеу керек екен. Біріншіден, ауылды сумен қамтитын желілерді толықтай мемлекет меншігіне өткізу күн тәртібінде тұр. Бұл ауыз су тарату орталықтандырып қана қоймай, төлем тарифіндегі алшақтықты да реттейді-мыс. Екіншіден, ауыз су тарату жүйесі ескірген, оны толықтай ауыстыруға аудан тарапынан қаржы бөлініп, шешілуі тиіс. Әрі су желілеріне қызмет көрсететін сорғылардағы құрылғылар да ескірген, көбіне қысымға шыдамай бұзылып жатады екен. Бұл да үлкен көлемдегі қаржыны қажет етіп отыр.
– Тұздыбастау ауылында 22 мың адам тұрады. Ауыз су мәселесі бар. Оны шешудің жолын қарастырып жатырмыз. Биыл аудан тарапынан 90 миллион теңге шамасында ақша бөлінді. Бұл қаржыға су құбыры мен кәріз жүйесін жаңалаудың құжатын жасап, енгіздік. Нәтижесі болады. Қазір ауыл маңында ұзындығы 12 шақырымдық магистральды су құбырының құрылысы жүріп жатыр, ол аяқталса, тұрғындарды сумен қамтуға қол жеткіземіз. Және екі құдық та қазылып жатыр, сыйымдылығы 250 текше метр болатын құдықтар іске қосылса, ауыз судың сапасы артып, толықтай жеткілікті болар еді, – дейді ауыл әкімі Мирас Баймолданов.
Айтпақшы, жақында Қонаев қаласында аудан әкімдерінің басын қосып, алқалы жиын өткізген Алматы облысының әкімі Марат Сұлтанғазиев тарапынан ауыз суға қатысты арыз-шағымның жиілеп кеткенін айтты.
– Облыстағы ауылдарда суға қатысты туындап отырған мәселе көп. Кейбір су құбырында қысым жеткіліксіз, кейбірінде магистралдық су жүйесі реттелмеген. Енді бірінде су сүзгісі жолға қойылмаған. Осы мәселелердің бәрін ауыл әкімдерімен бірлесіп, тексерістен өткізіп, жоба-жоспарын жасап жатырмыз. Су бар дейміз, бірақ іс жүзінде көшеден тасып ішіп, машақатын көріп жүрген ауыл тұрғындары жетерлік, – деді өңір басшысы.
Яғни облыс әкімі өңір тұрғындарының қордаланған мәселелерін шешу үшін ең алдымен ауылдарды ауыз сумен және көгілдір отынмен қамтамасыз ету бойынша тексеру, түгендеу жұмысын жүргізуді басты мақсат етіп отыр. Ол үшін тиісті органдар бүкіл аудандағы елді мекен, ауылдар бойынша су, газ, тағы да басқа мәселелер бойынша геокарта жасап, мәлімет беруі керек.
– Қай ауылда қай құбыр істемейді, қай құбыр толық жұмыс істеп тұр, қай құбырдың құрылысы орта жолда қалып қойған, осының бәрі картада көрсетілгені жөн. Егер біз осылай жүйелеп алмасақ, онда мәселенің шешімін табу қиын. Қазір статистикаға, деректерге бәрінің қолы жетеді. Жасырып қайтеміз, жоқты жоқ, барды бар деп айту керек. Оның үстіне қазір ауыл әкімдерін сайлап жатырмыз. Халық оларға сеніп отыр. Әкімдер бар күшін салып, үлкен ұмтылыспен, ынта-ықыласпен жұмыс істеуі қажет, – дейді Алматы облысының әкімі Марат Сұлтанғазиев.
Алматы облысы
