Бас жүлде қостанайлық әншіге бұйырды

Қостанайда ХІІ «Золотой микрофон» халықаралық балалар ән байқауы аяқталды. Бұл шараның жыл өткен сайы­н қанаты қатайып, аясы ке­ңейіп келеді. Биыл оған 60-тан астам жас әнші қатысты. Ең жас әнші төрт жасар Мәдина Қабжәлел байқауға Торғайдан келіп қатысты. Байқаудың мақсаты мәреден көріну болса керек. Үшінші орынды Астана қаласынан келген Егор Кривенко, алма­тылық Рауан Жолдасова, Ақтаудың «БиС» дуэті, қостанайлық Ардақ Ердәулет және Ресейдің Челябі қала­сынан келген Елизавета Грек бөлісті. Екінші орынды алматылық жас әнші Ақниет Сүйіндікова, қостанайлық Нұрилә Қоқанбекова, «Бай­терек» тобы, Беларусьтен келген Владислав Старченко алды. Бірінші орын ақтаулық Луиза Нұрқуатоваға, Алма­ты облысынан келген Қанат Перизатқа, болгарлық Ан­тонина Дими­троваға және қостанайлық Ай­дар Жазықбаевқа бұ­йыр­­ды. Айдарды халық­ара­лық байқаудың ұйым­дас­тырушылары Белорусьтегі ән фестиваліне шақырды. Ал ән бәйгесінің бас жүлдесін Жандос Мухаммади жеңіп алды. Ол облыстың Лисаков қаласындағы орта мектептің жоғары сыныбында оқиды. Оған облыс әкімі Нұралы Сәдуақасов 300 мың теңгенің сертификатын тапсырды. – «Золотой микрофон» ха­лықаралық балалар ән бай­қауы деңгейінің өскені сонша, мұндағы қазылар алқасы іріктеген жас әншілердің дүние­жүзіндегі осындай кез келген байқауда бағын сынатуға болады. Мұнда да Еуропадан, Азиядан жас дүлдүлдер, жас бұлбұлдар келді. Талант жасқа қарамайды екен. Екіншіден, әр жақтан келген балалар үш күнде достасып, кетерде қимай, жылап тарқасты. Мұны көрудің өзі де ғанибет! Бір өкініштісі, Украина тарабы жас таланттарды байқауға қа­тыстырмай билеттерін қайта өткізді, – дейді байқауды ұйымдастырушылардың бірі Вячеслав Авдеев. Белгілі композитор, қазы­лар алқасының төрағасы Кеңес Дүйсекеев байқауда қос­танайлықтарға Қостанай об­лысының әнұранын тарту етті. Байқаудың гала-кон­церті осы шығармамен қорытындыланды. Нәзира ЖӘРІМБЕТОВА, «Егемен Қазақстан». ҚОСТАНАЙ.