«Білім алу және түлектердің одан әрі жұмысқа орналасуы үшін жағдай жасаудың маңызы өте зор. Мәселен, жаңа оқу жылында педагогикалық және медициналық мамандықтар бойынша жоғары білім алуға 1 300-ге жуық грант бөлуді жоспарлап отырмыз. Бұған қоса әлеуметтік көмек бойынша жеке бағдарлама қарастырылған. Аталған әлеуметтік көмекті жағдайы төмен отбасылардан шыққан талапкерлерге қала университеттерінде білім алуы үшін оқу ақысын төлеу түрінде көрсетеміз. Бұл бағдарлама бойынша құжаттарды қабылдау 21 тамызға дейін (қоса алғанда) жалғасады. Оқу ақысын төлеу түріндегі әлеуметтік көмек жетім балалар, балалар үйінің түлектері, бала күнінен мүгедектігі бар, көпбалалы отбасылардан шыққан балалар арасында бөлінеді», деді А.Көлгінов.
Оның айтуынша, білім алу еңбек нарығында сұранысқа ие мамандықтар бойынша жүргізіледі: биотехнология, есептеу техникасы және бағдарламалық қамтамасыз ету, геодезия және картография (web-картография), сәулет (BIM-менеджер жобалаушы), мектепке дейінгі оқыту, жерге орналастыру-агроинженерия, инженер, жалпы медицина, педагогика, IT маманы, әлеуметтік жұмыс, жылу энергетикасы, азық-түлік өнімдерінің технологиясы, электр энергетикасы және т.б.
Қаланың жоғары оқу орындарында оқу ақысын төлеу түрінде әлеуметтік көмек алу үшін Жұмыспен қамту және әлеуметтік қорғау басқармасына (Бейбітшілік көшесі, 9) хабарласу керек немесе құжаттарды электронды түрде egov.kz веб-порталындағы «электрондық өтініш» бөлімі арқылы тапсыру қажет.
Әлеуметтік көмек отбасының бір мүшесі үшін 4 ең төменгі күнкөріс деңгейі мөлшерінен (190 088 теңге) аспайтын, жан басына шаққандағы орташа табысы болған кезде ақшалай төлем түрінде тағайындалады.
