«Отырар» мемлекеттік археологиялық музей-қорығының директоры Жанкелді Махашовтың айтуынша, «Ұлы Жібек жолы және Отырар алқабының ортағасырлық өркениеті» атты көшпелі көрме жәдігерлері екі бөлімге жинақталған. Алғашқы бөлімде ІХ-ХІІ ғасырлар кезіндегі Отырардың тыныс-тіршілігін баяндайтын зерттеулер нәтижелері, сол дәуірге тән түпнұсқа жәдігерлер ұсынылған. Ал екінші бөлімде әйгілі сұлтан Әмір Темір дәуірі мен Қазақ хандығы тұсындағы Отырар қаласының дамуын айшықтайтын заттай жәдігерлер қойылған.
– Ұлы Жібек жолының бойында орналасқан ортағасырлық Отырар қаласының тарихы тым тереңде жатыр. Археологиялық қазба жұмыстары кезінде әйгілі ойшыл Әл-Фараби дүниеге келген тарихи шаһардан X-XII ғасырларға тиесілі көп жәдігер табылған. Оның ішінде тұғырлы майшамдар, сан түрлі үлгіде жасалған қазандар мен құмыралар, су құбырының бөлшектері, сәнді саптыаяқтар, алуан пішіндегі қақпақтар, тостаған мен табақтар, сия сауыт пен кесе, моншақтар мен түймелер коллекциясы бар, – дейді Жангелді Махашов.
Мұнайлы өңір тұрғындарының назарына Ташкент, Яссы, Бұқара, Самарқанд, Шағатай, Қараханид, Қытай теңгелері мен дирхемдері ұсынылып отыр. Көне жәдігерлердің арасында Аламбик шынысынан жасалған түрлі ыдыс пен шыны ваза, қала ғимараттарын қаптаған жазуы бар қаптамалар мен өрнекті кірпіштер, политра мен сфераконус, селадон фарфорынан жасалған Қытай ыдыстары назар аударады. Сол кезеңдегі «Диуани Хикмет» пен «Тартиби Зибо» грамматикалық еңбегінің, «Мулла Қасым» діни кітаптарының алар орны ерекше екені даусыз.
Атырау облысы
