«Том ағайдың үйі», авторы Гарриет Бичер Стоу
«Демек сіз осы ұлы соғыс туралы кітап жазған әйел қаламгерсіз». Авраам Линкольн 1862 жылы жазушы Гарриет Бичер Стоумен кездескен кезде осылай деп еді. «Том ағайдың үйі» романы жарыққа шыққан он жылдан кейін ХІХ ғасырдағы ең көп сатылған кітаптың бірі болды. Романда Том ағайдың, афроамерикалық құлдың оқиғасы құлдық қасіретін алғаш рет көркем шығарма деңгейінде жұртшылықтың назарына ұсынылып, көптеген оқырманды ойға қалдырды.
«Джунгли» романы, авторы Аптон Синклэр
Журналист Аптон Синклэрдің 1906 жылғы романы Чикагоның ет өңдеу өнеркәсібіндегі иммигрант жұмысшылардың басынан өткізген оқиғаларын, әртүрлі қиыншылықтарын, ауыр еңбекке жегілу жағдайларын, кедейлік өмір мен әсіре қанауды сөз етеді. Бұл кітап қара жұмыс істейтін кедейлердің ауыр халін, билік басындағылардың жең ұшынан жалғасқан жемқорлығын ашық көрсеткісі келген. Сол себепті бұл шығарма өткен ғасырдағы АҚШ-тағы саяси ықпалы күшті туындылардың бірі болып саналды. «Джунглиді» оқығаннан кейін президент Теодор Рузвельт Чикагоның ет өңдеу өнеркәсібіне тергеу жүргізуді тапсырады. Бір жылдың ішінде «Таза азық-түлік және дәрі-дәрмек туралы» Заңмен бірге ет инспекциясы туралы заң қабылданды, ол кейіннен Азық-түлік және дәрі-дәрмек басқармасының құрылуына себеп болады.
«Қаһарлы жүзім», авторы Джон Стейнбек
Әлемдік бестселлерге айналған бұл роман Калифорнияға жұмыс табу үшін сапарға шыққан жүз мыңдаған мигранттың депрессия дәуіріндегі ауыр кедейлік пен жоқшылық жағдайын сөз етеді. Бұл шығарма да цензураға ұшырады, айталық аталған романға Калифорнияда тыйым салынды және өртелді.
