Ақпараттар ағыны

* Кеден одағы құрылғалы Қа­зақстанда автомобиль өндірісі 24 есеге өсті. Экономика және бюд­жеттік жоспарлау министрлігі ха­лықаралық экономикалық интеграция департаментінің директоры Ернар Бәкеновтің айтуынша, осы аралықта шет елдерге аккумулятор экспорттау 1,7 есеге, конденсатор шығару 1,3 есеге өскен. «Бұл Үкіметтің интеграциялық үр­діс аясында өткізіп отырған оқиғаларымен де байланысты», – деді ол. * 2017 жылғы Универ­сиа­даның нысандары белгіленген мер­зімде тапсырылуы тиіс. Алматы қаласының әкімі Ахмет­жан Есімов кеше оңтүстік мегапо­листің инфрақұрылымына қосы­латын құрылыстарды көру барысында осындай тапсырма берді. * Астанада 15 мамырда Есіл­дегі кеме жүзу маусымы ашылады. Қазір осыны қамтамасыз ететін кәсіпорын флотында 8 кеме қызмет көрсетуге сақадай-сай дайын тұр. Бұған қоса, өзен бойында «Кенесары» және «Рэдиссон» деп аталатын 2 айлақ құрылған. * Шымкентте автомобиль шығаратын зауыт салу­ға ниет жасалды. Мұндай мәмі­леге Кореяда өткен Оңтүстік Қазақ­­станның инвестициялық мүм­кін­­діктері көрмесінде қол жетті. Форумда түстік өлкенің «Жил­СтройИндустрия» ЖШС мен кореялық «Seolim Trading» компаниясы арасында «Daewoo» ав­то­көліктерін шығаратын кәсіп­орын ашу жөніндегі келісімге қол қойылды. * Өскеменде қазақ тілі мен әде­биеті пәнінен халықаралық олимпиада өтті. КСРО Мем­ле­кеттік сыйлығының лауреаты, академик Қанипа Бітібаева атындағы білім сайысына Қазақстан аймақтарынан бө­лек, Қырғызстан, Өзбекстан, Моң­ғолия, Қытай және Ресей мем­лекеттерінен келген 9-10 сынып оқушылары қатысып, қазақ тілінен білім жарыстырды. * Қызылорда облысының Қа­залы ауданында апатты жағ­дайда тұрған 7 мектеп ғима­рат­тары жаңартылады. Мұның жайын бұрнағы күні өңірде өткен актив жиналысына қатысқан облыс әкімі Қырымбек Көшербаев тарқатып айтты. Білім ғимараттары келер жылдың соңына дейін салынады. Аймақ басшысының айтуынша, олардағы жарық мәселесін шешуге облыстық бюджеттен 182 млн. теңге қарастырылады. * Ақмола облысының Ат­ба­сар қаласында тасқыннан зар­­дап шеккен тұрғындарға жаңа үйлер салынып жатыр. Сарап­­шы ұйымдардың шешімдері бойын­ша 45 пәтерден тұратын 4 үй салу жоспарланды. Сол сияқты  медицина колледжінің бұрынғы жатақханасы күрделі жөндеуден өткізіліп, 29 бөлмесі зардап шеккендерге берілмекші. «ҚазАқпарат», «Қазақстан жаңалықтары», Egemen.kz хабарлары бойынша дайындалды.