Облыстық тарихи-мәдени мұраны қорғау және пайдалану орталығының қызметкерлері әр төбесінің астында көне тарихтың көмбесі бұғып жатқан Бурабай өңірін барлаған. Шынын айтуымыз керек, бұл жерлердің басым бөлігі ауыл шаруашылығы мақсатында пайдаланылуда. Кезінде талай құнды дүниенің құрдымға кеткені де рас. Көненің көзін, арыдағы жұрттың ізін барлаған уақытта бұл аумақта «Регион дорстрой» серіктестігіне бөлінген жерден ат басындай олжа табылады деп кім ойлаған. Әуелі орталық қызметкерлері Жаңажол ауылының маңында жидек теріп жүрген адамдармен тілдескен. Олар осы маңда тылсым тарихтың тұнық сыры бұғып жатқан жер кезігуі мүмкін деп жөн сілтесе керек. Дер шағында тауыпты, әйтпесе, жеті қат жердің астындағы құнды жәдігерлердің табиғи және антропогендік себептердің әсерінен жойылып жатқаны да жасырын сыр емес қой.
– Зерттеу барысында қорғандағы шұңқырдан темір дәуірінде күн кешкен сақ жауынгерінің мәйіті табылды. Жанынан дөңес тіреуіштері бар ауыздық, жүгенді әшекейлеген әрқилы бұйымдар, сүйектен жасалған заттар тәрізді жәдігерлер шықты. Құстың басы таңбаланған, күн құдайының белгісі көшірілген жапсырмалар да бар. Қанжар, пышақ, тасқайрақ, он дана сақ-скифтік үлгідегі жебенің ұштары, қысқа қылыш та ғалымдар назарын аударып отыр, – дейді орталық директоры Жасұлан Укеев.
Табылған жәдігерлер толық зерделеніп, зерттелгеннен кейін облыстық тарихи-өлкетану музейіне тапсырылмақ.
Ақмола облысы
