Аталған жобаға өз әлеуетін, көшбасшылық қасиетін дамытуға құштар, бастамашыл идеялар мен жобаларды іске асыруға мүдделі 18-28 жас аралығындағы талапкерлер қатысты. Мұнда ерекше басымдылық әлеуметтік осал санаттағы жастарға берілді. Ниет білдірушілердің өтінімдері сайт арқылы онлайн қабылданды.
Жетісу облысы әкімінің орынбасары Рустам Әлиев аталған жоба өңір жастарына үлкен қолдау болатынын айтады.
«Қазіргі уақытта жастар арасында білім деңгейінің төмендігі, өзіне және болашағына сенімсіздік, масылдық көңіл күй, отбасылық мәселелер, жұмыссыздық сияқты проблемалар өзекті. Сондықтан аталған жобаны іске асыру ең алдымен, жастарды қолдап, оларды қоғамдық пайдалы қызметке тарту. Жастар өз өмірлерін өзгертуге, өздеріне сенуге мүмкіндік алады», дейді Р.Әлиев.
Ал Ақпарат және қоғамдық даму министрлігі Жастар және отбасы істері комитетінің басқарма басшысы Алмагүл Құтанова министрлік қазір жастар жұмысына қатысты бірқатар тәсілді қайта қарастырып жатқанына және Zhasproject сияқты атаулы және нақты жобалар болашақта өз жемісін беретініне сенім білдірді.
Байқау кезеңінде жастардан 682 өтінім түскен. Техникалық іріктеу кезеңінде қажетті құжаттардың конкурс талаптарына сәйкес келмеуіне байланысты 321 өтінім қабылданбады. Арнайы байқау комиссиясы шағын гранттар байқауының 63 жеңімпазын анықтады. Оның ішінде әлеуметтік осал санаттағы 48 жас бар. Олардың дені жұмыссыздар, мүмкіндігі шектеулі жандар, мүгедектігі бар бала тәрбиелеп отырған жас аналар, көпбалалы жас аналар.
Енді жұмыссыз жастар оқып, өз жобаларын жүзеге асыра алады. Мәселен, олар наубайхана, балаларды дамыту орталығы, массаж кабинеті, веб-дизайн курстары, роботтехника, копирайтинг, пластмасса, жүн, тоқыма өңдеумен айналыса алады.
Ақшалай қолдаудан бөлек жоба қатысушыларына өмірлік маңызды дағдылар мен жобаларды басқару бойынша қысқаша оқыту ұсынылады. Себебі ел ішінде әлеуметтік кәсіпкерлік енді ғана дами бастады. Сондықтан қоғамға пайда әкелетін жаңа жобаларды құруға деген ұмтылысы бар жастарды жан-жақты қолдау барынша тиімді.
Жастарды әлеуметтік кәсіпкерлікті жүргізу негіздеріне үйрету үшін Zhasрroject секілді бастапқы кезеңде гранттық қолдау көрсету қажет. Жасыратыны жоқ, әлеуметтік осал санаттағы топтар қажетті білімге ие емес. Мысалы, олар келісімшарттың қалай жасалатынын білмейді, ешқашан шот-фактураны алмаған, қажетті заңдарды оқымаған. Осындай жастардың қаржылық және құқықтық сауатын арттыру үшін менторлар пулы жұмыс істейді.
Zhasproject жобасын жүзеге асыруға Алматы және Жетісу облыстарындағы аудандық және қалалық жастар ресурстық орталықтары, сондай-ақ ауылдық округтердегі жастармен жұмыс жөніндегі әдіскерлер белсенді түрде тартылған. Жергілікті жерлерде жұмыспен қамту орталықтарымен, ауылдық әкімдіктермен бірлесіп белсенді түсіндіру жұмыстары жүргізілген.
«Өмірде қиын жағдайға тап болған кез келген көпбалалы жас отбасы, мүмкіндігі шектеулі жандар, шалғайдағы ауылдардан келген ауыл жастары жобаға қатыса алады. Мұнда олар өз күшіне сенуге, туған ауылына пайда әкелуге және өз ісін табуға мүмкіндік алады», дейді Алматы және Жетісу облыстарындағы Zhasproject жобасының жетекшісі Әлия Құдайбергенқызы.
Жетісу облысы
