22 мамыр жаңбырлы болды. Түнімен селдеткен жаңбыр жұртты да, өзін де шаршатып, сілелеп барып тоқтады. Табиғаттың тосын сыйына қарамастан, “Сарыағаш” гольф клубында “Sary Agash Open” ІІ турнирі өтті. Алматы, Астана мен Шымкент қалаларының мықты гольфшылары жиналған турнирге Мемлекет басшысы Нұрсұлтан Назарбаев қатысты.
Жүз жылдығын ойлаған ел ұрпақ тәрбиелейді
Гольф – шөбі біртегіс қырқылған алаңқайдағы ұяшықтарға қолындағы асатаяқтарымен шағын шарды кіргізіп жүретін, дүниенің шаруасы пәруайымына кірмейтін ауқатты адамдардың ермегі сияқты көрінгенімен, жолы жағынан – бекзат өнер. 2016 жылы олимпия ойындары бағдарламасына кіретін гольф түбінде бүкілхалықтық ойындардың бірі болатын секілді.
Ал емдік суы дүние жүзіндегі әйгілі курорттардағы арасан суларынан бір мысқал кем түспейтін Сарыағаш шипажайларының жанында, қыздың бұрымындай Келес өзенінің бір сағасынан орын алған “Сарыағаш” гольф клубы бір есептен еліміз экономикасының қаншалықты қуаттылығын танытардай көрінеді. Өркениетті елдер мемлекетті бағалағанда осындай құндылықтарды да есепке алады.
Кәсіби гольф ойыншысы, Ресей чемпионатының жеңімпазы, Алматыдағы “Nurtau” гольф клубының директоры Константин Ливанов 92 гектар аумақты алып жатқан Сарыағаш гольф алаңына жоғары баға берсе, Қазақстан гольф федерациясы ұйымдастырған турнир өте қызғылықты, тартысты өтті.
Жексенбі күні Елбасы Шымкент қаласына келіп, “Даңқ” мемориалына гүл шоғын қойды. “Даңқ” мемориалы – Абай атындағы саябақтың мазмұнын арттырып қана тұрған жоқ, ол Ұлы Отан соғысында елі, жері үшін қан майданда шайқасқан жауынгерлердің ерлік баяны, жас ұрпақты Отанын шексіз сүюге үндейтін қасиетті орын.
Оңтүстік Қазақстан облысынан Ұлы Отан соғысына 140 мыңдай адам аттанған болса, солардың жартысына жуығы туған жерге оралмады. Оңтүстікқазақстандықтар қатарынан 51 жауынгерге Кеңес Одағының Батыры атағы берілді. Сегіз адам Даңқ орденінің толық иегері атанды. Сондай-ақ, шардаралық соғыс ардагері М.Қалмырзаевқа Ұлы Жеңістің 60 жылдығына орай “Халық Қаһарманы” атағы берілген болатын.
Ұлы Жеңістің 65 жылдығы мерекесін жоғары деңгейде атап өту үшін, ардагерлерді ардақтау мақсатында бүкіл кең-байтақ Отанымыздағыдай, Оңтүстік өңірінде де жан-жақты жұмыстар атқарылды. Облыс әкімдігінің 2010 жылғы 5 қаңтардағы қаулысымен “1941-1945 жылдардағы Ұлы Отан соғысындағы Жеңістің 65 жылдығын мерекелеуге дайындық және оны өткізу жөніндегі іс-шаралар жоспары” бекітілді. Осы жоспарды жүзеге асыру қызу қолға алынды. Облыстық, аудандық және қалалық комиссиялар құрылып, нақтылы жұмыстар жүйелі және тынымсыз атқарылды.
Облыс әкімі Асқар Мырзахметовтің бастамасымен Шымкент қаласындағы Абай атындағы саябақта “Даңқ” мемориалы салынып, онда облыстан соғысқа аттанған 140 мыңға жуық майдангердің аты-жөні қастерленіп жазылды. Осыншама есімдерді анықтау, енгізілмей қалып қойғандарды қосу, әрине, көп-көп күш-жігер мен ізденісті, ерінбес еңбекті талап еткені түсінікті болса керек. “Даңқ” мемориалы кешенінің құрылысы бизнестің әлеуметтік жауапкершілігі бағдарламасына сәйкес жүргізілді. Кешен құрамына Ұлы Отан соғысындағы Жеңіске арналған бұрынғы ескерткіш және Ауған соғысында қаза тапқан боздақтарға орнатылған құлпытастар тізбегі күрделі жөнделіп, үйлестіріле енгізілді. Мемориалдың мән-мазмұнына, айнала-төңірегінің көріктендірілуіне, жалпы бір кездері талан-таражға түсіп кете жаздаған Абай саябағының сапалы жөнделіп, саналарға сәуле шашыратып тұрғанына барша жұртшылық – ардагерлер де, жастар да алғыс сезімдерін білдіруде.
Қазір облысымызда сұрапыл соғысқа қатысып, аман оралған 1412 ардагер, майданда қаза тапқан жауынгерлердің 87 жесірі, қайтыс болған соғыс мүгедектерінің 1369 жесірі және 26 мыңнан астам тыл ардагері бар. Осылардың бәріне де жан-жақты қамқорлық көрсетілуде.
Ұлы Жеңіс мерекесі қарсаңында 27 ардагер тұрғын үймен қамтамасыз етілді. Олардың арасында Кеңес Одағының Батыры Тоғанбай Қауымбаев пен Даңқ орденінің толық иегері Қарабай Қалтаев бар. 400-ден аса ардагердің тұрғын үйлері жөндеуден өткізілді. 1549 ардагерге коммуналдық қызмет ақысын төлеуге жеңілдік жасалды. Ал 1671 ардагер санаторийлер мен курорттарда емделді. Жыл аяғына дейін 5 мыңнан астам ардагер ем алады және демалады.
Ардагерлерді қосымша әлеуметтік қолдау мақсатында “Біз – Жеңіс мұрагеріміз” атты қайырымдылық акциясы ұйымдастырылды. Нәтижесінде облыстық ардагерлер қорына 46 млн. теңге, аудандық, қалалық қорларға 80 млн.теңгеден астам қаржы түсті. Бұл қаржы ардагерлердің мұқтажына жұмсалды. Майдангер ата-апаларымыз қандай құрметке де лайық.
“Даңқ” мемориалына жұрт көп жиналған еді. Жоғары жағында ел басына күн туғанда қолына қару алып, айқасқа түскен майдангерлер, облыс ардагерлері отырды. Елбасы сөз сөйледі. Майдангерлерге арналған ескерткіштің мәніне тоқталды.
...Себебі, біз – соғыста жеңген әкелердің балаларымыз. Солардың арқасында бейбітшілікте өмір сүріп, жақсылық көріп, бала-шаға өсіріп, қызметке ие болып отырмыз. Майданға Қазақстаннан 1,5 млн.-нан аса жауынгер аттанса, соның дені 18-20 жастағы боздақтар еді. Көпшілігі отбасын құрып, өмірге сәби әкелуге үлгермей майдан даласында қыршын кетті. Біз олардың ерлігін ұмытпауымыз керек, деді Президент. Елбасы майдангерлерден бөлек Ауған соғысы ардагерлеріне, тылдағы еңбек майданында болған аға буынға алғыс айтты. Мемлекет тарапынан көмектер беріліп жатқандығын тілге тиек етті.
“Атаңды қадірлесең, балаң сені қадірлейді” деп сөзін түйіндеген Мемлекет басшысы алқалаған әлеуметке Қазақстанның кешегісі мен бүгінін салыстырды. Тәуелсіздіктің алғашқы жылдарындағы қиындықтар – зейнетақы, жалақы төлей алмай, бүк түсіп жатқан уақыт. Кей қалалардың түнде шамы да жанбайтын. Қазақстан ел бола ма, болмай ма деп тұрған өліара шақтан аман өттік. Қиындықтарды жеңдік. Кеңес Одағы дәурендеп тұрған шақта 14-15-ші орындарда жүретін Қазақстан қазір сол елдер арасында көптеген салалар бойынша көшбасшылыққа ие. Қаржы дағдарысы кезінде өркениетті, әлеуеті мықты мемлекеттердің өзі қиналып, жалақы, зейнетақыларын қысқартып жатыр. Жұмыссыздық белең алды. Ал, бізде жаңа жұмыс орындары ашылуда. Біз индустриялық-инновациялық бағдарламаларды қолға алып, орындалуына күш салудамыз.
Соның ішінде Оңтүстік Қазақстан облысына көп көңіл бөлінуде. Республика бойынша ең көп мектеп салынған да осы облыс. Шымкент қаласының дамуына да айтарлықтай қаржы бөлінді. Мырзашөл мен Сарыағаштың арасын жалғау үшін алып көпір салдық. Көксарай суы реттегіші іске қосылды. Батыстан көгілдір отын тартылып жатыр. Батыс Еуропа-Батыс Қытай автомагистралі Оңтүстік жерінен өтеді. Бұл жұмыстардың ел игілігі үшін жасалып жатқанын білесіздер, деді Нұрсұлтан Назарбаев.
Елбасы келесі кезекте Қазақстанның өскен, өркендеген 56 мемлекетке төрағалық ету құрметіне ие болғанына тоқталды. Осының бәрі елдің, көпэтносты халқымыздың ізгі тілегі, ата-бабаларымыздың ұрпағының қамы үшін төккен қаны, берген өсиеті арқасында жүзеге асуда екенін жеткізді. Келер ұрпақ біз істеген жұмыстардың жемісін теріп жеп, бұдан да бақытты, шаттық заманда өмір сүрсін, деді Президент.
Елбасының сөзін халық қызу қолдап, қол соқты. Ортаға аға буын мен жас ұрпақтың өкілі шығып, мемлекетіміздің келешегі кемел болуы жолында жасалып жатқан жұмыстар үшін Мемлекет басшысына алғысын білдірді.
– Ұлы Жеңіс жолында қан майданда көкірегін оққа тосқан аталарымыздың ерлігін Сіз жалғастырдыңыз. Тәуелсіз Қазақстанды, әлем мойындаған мемлекетті құрдыңыз. Біздер, жастар шексіз ризамыз. Бұған озат оқу, Отанымыздың көркеюі үшін адал еңбекпен жауап береміз, – деді жалындаған жастар.
Елбасы “Даңқ” мемориалын аралады. Осындағы жасалған жұмыстарды облыс әкімі Асқар Мырзахметов баяндап берді. Шыға берісте көкіректері орден, медальдарға толы бір топ майдангер жолығып, баталарын берді. “Батамен ер көгереді” дейді халық даналығы. Елді ел қылған Ері алдына келіп тұрған соң, ағалар жақсы тілегін айтып жатты.
Білімдінің алды жарық
Қаланың батыс жақ бетінде Қазығұрт деген шағын аудан бар. Халқы көбейіп, оқушылар саны артқандығы қатты білінетін. Биылғы оқу жылы осы шағын аудан үшін жақсылығы мол болды. Сәулетті мектеп пайдалануға берілді. Жаңа мектеп алдында Елбасын ұстаздар мен ата-аналар қауымы қол шапалақтап қарсы алды. Облыс әкімі Асқар Мырзахметов Мемлекет басшысын білім саласындағы атқарылып жатқан жұмыстармен таныстырды.
2009 жылы Оңтүстікте 35 мектеп пайдалануға берілсе, соның ішінде “100 мектеп, 100 аурухана” бағдарламасы бойынша берілгені – 24 мектеп. Ал, 2010 жылы 64 мектеп пен 16 қосымша корпустардың құрылысы жүргізілуде. Облыс бойынша үш ауысымда оқитын 29 мектеп қалып отыр.
Облыс басшысы апатты жағдайдағы 62 мектеп пен саман кірпіштен салынған оқу орындарының мәселесі қалай шешіліп жатқанын баяндап берді. Қосымша ақпараттарды облыстық білім басқармасының бастығы Балқия Көмекбаева мен қалалық білім бөлімінің бастығы Жанат Тәжиева толықтырды.
Мектеп ішін аралап, сыныптардың жарақтауын көрген Елбасы спорт залға бұрылған. Әлгінде ғана баскетболдың сақина торына добын бір түсіріп, бір түсіре алмай жатқан мектеп спортшылары Нұрсұлтан Әбішұлының алдында мықты ойнауға тырысып бақты.
– Жақсы спортшы болған дұрыс. Спорт – ең алдымен денсаулық үшін керек. Мықты болыңдар, – деді Елбасы.
Нұрсұлтан Әбішұлы ұстаздармен пікірлесіп тұрғанда, көзі шоқтай жанған оқушы Сізге арналған өлеңім бар еді, рұқсат етіңізші деп өтінді.
...Біздің жақсы оқымауға хақымыз жоқ
Жасап тұр бар жақсылықты ағаларым.
...Нұр аға, Сіз болдыңыз
Көк байрақты
Еуропаның төрінде желбіреткен, – дейді 6-шы сыныптың оқушысы Әділет Жұпарбеков. Елбасының алақаны Әділеттің басын сипады. 1200 оқушыға лайықталып салынған үш қабатты мектеп лингафон кабинеттерімен, компьютер сыныптарымен, лабораториялық құралдармен толық жабдықталған. Не керектің бәрі бар. Расында, оқушы бала айтқандай, жақсы оқымауға осындағы оқушылардың хақылары жоқ-ау.
“XXІ ғасыр – білімділердің ғасыры – деді Елбасы. – Қазақстанның жастары білімді, тәрбиелі болуы үшін осындай зәулім мектептер салына береді”.
Бақтияр ТАЙЖАН, Оңтүстік Қазақстан облысы. Суреттерді түсіргендер С.БОНДАРЕНКО, Б.ОТАРБАЕВ.
