Қоғам • 03 Қазан, 2022

Елде қылмыс азайған

49 рет көрсетілді

Еліміздің Ішкі істер министрі Марат Ахметжанов Өскемендегі «Ертіс концерт» орталық мәдениет үйінде өңір жұртшылығымен кездесіп, салада қолға алынған ауқымды реформаларды түсіндіріп, тұрғындардың сауалдарына жауап берді. Кездесу тікелей әлеуметтік желілер арқылы да таратылды.

Мемлекет басшысы Қасым-Жомарт Тоқаев ел полицейлеріне «Халық сеніміне ие болыңдар» деген міндет қойып отыр. Саланың жұмысы құрғақ цифрлармен емес, тұрғындардың ой-пікірімен өлшенуге тиіс. Жұртқа барынша жақын болу үшін министр барлық құрылымдық бөлім басшыларымен өңірлерді аралауға кіріскен. Облыс-аудан деңгейіндегі полиция басшылары да жер-жерде елмен кездесулер ұйымдастыратын болады.

Сала басшысы өз сөзін конституциялық реформаның маңызын түсіндіруден бастады. Жазда өткен бүкілхалықтық референдумда халықтың басым бөлігі Ата Заңға енгізілген өзгерістерді жақтап дауыс берді. Түзетулер Конституцияның үштен бірін қамтыды. Мұның бәрі елдегі саяси жүйені түбегейлі өзгертуге, билік тармақтарының өкілеттігін қайта бөлуге, жалпы қоғамды одан әрі демократияландыруға берік негіз болмақ.

– Конституциялық реформаның нәтижесін­де біз суперпрезиденттік басқару формасынан толық бас тартып, ықпалды Парламенті мен есеп беретін Үкіметі бар президенттік жүйеге ойыстық. Конституциялық сот органының рөлі күшейді, енді оған кез келген азамат жүгіне алады. Адам құқығы жөніндегі өкілетті тұлға институты енгізіледі. Сонымен қатар сот шешімі­мен азаматты мәжбүрлі еңбекке тарту мүмкіндігі пайда болды. Яғни енді құқық бұзған адамдар­ды заң аясында қоғамдық жұмыстарға тартуға ­болады, – деді министр.

Жиында Марат Ахметжанов елдегі қылмыс жағдайына кеңінен тоқталды. Жалпы, соңғы отыз жылдың ішінде қылмыстар саны бірнеше есе қысқарып отыр. Айталық, 90-жылдар­дың басын­да жылына 2600-ден астам қылмыс тіркелсе, қазір бір жылда шамамен 700-800 қылмыс жаса­лады. Әрине, полиция басшылығы мұндай көрсеткіштерге тоқмейілсуге болмайтынын айтады.

– Қазіргі кезде қоғамды есірткі бизнесі, интернет алаяқтық, отбасы-тұрмыстық жанжал, шеттен әкелінген көліктерді есепке алу сынды мәселелер көбірек толғандырып отыр. Біз осы қылмыс түрлерімен аяусыз күрес жүргізіп келеміз, – деді Марат Мұратұлы.

Елімізде тіркелетін қылмыстардың 5,6 пайызы Шығыс Қазақстанның үлесіне тиесілі. Соңғы жылдары қылмыс деңгейі 26 пайызға төмендеген. Десек те қылмыс санын адам басына шағар болсақ, өңір көш басында келеді. Министр бұл мәселе егжей-тегжей зерделеніп, оны шешудің жолдары қарастырылатынын жеткізді.

– Бұрын ұрлық, қыз зорлау қылмыстары ауыр деп саналмайтын. Соның кесірінен ұрылар ұсталған жағдайда жәбірленушіге шығынын өтеп, кешірімін алып, жауапкершіліктен құтылып кететін. Жазадан жалтарғандар рецидив жасап, одан да ауыр қылмыстарға баратын. Мал ұрлығы тіпті кәсіп­тің бір түріне айналып кетті деуге де болады. Заңды қатаңдатып, аталған қылмыстар жәбірлену­ші­лер тарапынан кешірілмейтін болған соң, ұрлық 2,5 есе, зорлау 3 есеге азайды, – деді Ішкі істер министрі.

Полицияның алдында қағазбастылықтан арылу, жұмыс барысын цифрландыру, автоматтандыру және оңтайландыру міндеттері тұр. Қазақстан полициясы біртіндеп батыстық үлгіге көшеді. Полицейлер азаматтармен ілтипатты қарым-қатынас жасауға үйренуге тиіс. Ал министрлік өз кезегінде сала қызметкерлерінің әлеуметтік-тұрмыстық жағдайын жақсартуға күш салмақ.

Жиынның екінші бөлігінде министр жи­налғандардың сұрақтарына жауап берді. Сауал­дардың бір бөлігі полицейлер тарапынан жа­салған заң бұзушылықтарға қатысты болды. Олар бойынша жүгінген азаматтарды сала бас­шысы жеке қабылдауға шақырды. Кейбір өске­мендіктер соңғы кездері елімізге Ресейден келушілердің көбейгенін айтып, бұл жайтқа алаңдаушылы­ғын білдірді.

– Елімізге жыл сайын шеттен 6 миллионға жуық адам келеді. Біз олардың бәрін тиісті тек­серуден өткіземіз. Алаңдауға еш негіз жоқ. Жағ­дай бақылауда. Егер шетел азаматтары заң бұзса, тиісті жазаға тартылады. Ресейлік әріптес­терімізбен байланысымыз жақсы, бірлесе жұмыс істейміз, – деді осы ретте Марат Ахметжанов.

 

Шығыс Қазақстан облысы

Соңғы жаңалықтар

Конституциялық мәртебе берілді

Қазақстан • Бүгін, 01:05

Блогер журналист емес!

Қоғам • Бүгін, 00:52

Сот жүйесін жетілдіру

Саясат • Бүгін, 00:06

Мақташылардың мұңы

Экономика • Кеше

Уақыт талабы

Қоғам • Кеше

Күрескер Гейне

Әдебиет • Кеше

Ажалды жеңген Аспан

Әдебиет • Кеше

Ағаш көшеті егілді

Аймақтар • Кеше

Қасқыр

Өнер • Кеше

Ұқсас жаңалықтар