Абай облысын құру мәселесінде Қасым-Жомарт Кемелұлының саяси қарым-қабілеті мен көреген дипломатқа тән қайраткерлік еңбегі жатыр. Шын мәнінде, 25 жыл ішінде Семей Шығыс Қазақстанның құрамында болып, өзге қалалар секілді құрдымға кетіп қалған жоқ. Іскер азаматтар мен халықтың арқасында шаһарымыз өзінің бет-бейнесін сақтап қалды. Біраз қиындық болғаны белгілі.
Наурыз айында Мемлекет басшысы Абай облысының құрылатынын айтқанда кеудемізді қуаныш кернеді. Семей туралы ой қозғағанда, бірнеше мәселені бөліп айтар едім. Біріншіден, таяуда Президент қасиетті Түркістан еліміздің тарихи-мәдени орталығына айналады деп айтқан еді. Рас, киелі Түркістан бұл мәртебеге әбден лайық. Кейінгі жылдары аталған шаһарда жүргізілген жұмыстар көпшілікті таңғалдырып отыр. Өңірімізге жасаған сапарында Қасым-Жомарт Тоқаев жауапты органдарға Семейді мәдени-рухани орталыққа айналдыруға байланысты тапсырма берді. Жасыратыны жоқ, мұны іске асыру үшін қомақты қаражат пен қажырлы еңбек қажет. Оның барлығы алдағы уақытта жүзеге асырылады деп ойлаймыз.
Президент жергілікті халықпен кездесу кезінде өңірді дамытуға байланысты орамды ойлары мен ілкімді бастамаларын ортаға салды. Айталық, жаңадан жылу электр орталығы мен заман талабына сай көпір салу, әбден тозығы жеткен инженерлік инфрақұрылымды жаңарту – Семейде ұзақ жылдан бері лайықты шешімін таба алмай жүрген өзекті мәселелердің бірі.
Ғалым болғандықтан, әсіресе ғылым мен білімге байланысты айтқан бастамалары көңілге үлкен үміт ұялатып отыр. Оның ішінде шетелдік іргелі университеттердің бөлімшелерін қаламызда ашу жөніндегі бастама құптарлықтай. Ғылымға жастарды көптеп тарту бойынша Президент бірқатар тапсырма жүктеді. Бұл бағытта біздің университет жұмысты бастап кеткенін айта кеткен орынды. Сондай-ақ Мемлекет басшысы Семейде IT-мектептерді ашудың маңыздылығына тоқталды. Жаңа өнеркәсіп орындары мен заман талабына сай медициналық орталықтарды ашуға байланысты жақсы жаңалықтар да айтылды.
Бұдан бөлек, қазір әлемде қалыптасқан күрделі геосаяси ахуалға да тоқталып, Мемлекет басшысы ортақ шаңырағымыз бірлігі мен ынтымағы жарасқан – Қазақстандағы бейбіт өмір мен тұрақтылықты сақтаудың қаншалықты маңызды екеніне назар аударды. Расымен де, пандемиядан енді айығып келе жатқанда жаһандағы жағдай алаңдатарлықтай. Алысқа бармай-ақ, көршілес Ресей мен Украинаның арасындағы, сондай-ақ Әзербайжан мен Арменияның арасындағы және бауырлас Қырғызстан мен Тәжікстан арасындағы дағдарыс әлемнің қаншалықты нәзік екенін байқатып отыр. Сондықтан еліміздегі береке-бірлікті сақтау қазір аса маңызды.
Сондай-ақ Президент Мұхтар Әуезов пен Қайым Мұхамедхановқа арналған «Ұстаз бен шәкірт» ескерткішін ашты. Бұны тек Мұхтар мен Қайымға ғана арналған көркем композиция деп қабылдамаған жөн. Бұл тұтастай білім беру саласында қызмет етіп келе жатқан ұстаздар мен шәкірттерге көрсетілген құрмет деп қабылдадық. Мемлекет басшысының өңірге сапары жемісті болды деп ойлаймын. Алдағы уақытта Қасым-Жомарт Тоқаев айтқан нұсқаулықтар тиімді жүзеге асырылса, онда Абай облысы гүлденіп, өркендей түседі деген сеніміміз мол.
Арап ЕСПЕНБЕТОВ,
филология ғылымдарының докторы, профессор,
Абай облысы