Енді өзгерістерге тоқталсам. Алдымызда сайлау науқаны келе жатыр. Ел Президенті Қасым-Жомарт Тоқаев кезектен тыс президенттік сайлау өтетін күнге 2022 жылғы 20 қарашаны белгіледі.
Бұл қазіргі биліктің дұрыс шешімі екеніне сенімім мол. Елімізде демократиялық бағыттағы саяси өзгерістер басталғаны сөзсіз. Қасым-Жомарт Тоқаевтың Қазақстан халқына үндеуі 2019 жылдан бергі президенттік кезеңінің нәтижелері мен қорытындыларын жасаумен бірдей.
Осы уақыт ішінде Президент пен мемлекеттік билік үлкен жұмыс атқарды. Соның ішінде, партияларға сайлауға қатысу үшін тіркеу кезінде 30 пайыздық квота енгізілді. Бұл тізімге 30 пайыз жастар мен әйелдер кіруі керек дегенді білдіреді. Партияларды тіркеу шегі төмендетілді, бұл да демократиялық өзгерістер көрсеткіші.
Отандастарымыздың белсенділігі мен саяси көзқарастарына сүйенсек, жақын арада бірнеше саяси партия құрылатынын аңғару қиын емес. Өйткені бүгінгі таңда қазақстандықтар арасында саяси белсенділік артып келеді.
Халқымызда сайлаудан кейін жаңа дәуір басталады деген үміт бар. Себебі көп нәрсе айтылды, көп нәрсе уәде етілді және оны жүзеге асыру үшін Президенттің өзі айтқандай жеті жыл жеткілікті.
Президент халыққа үндеуінде сайлауға қазақстандық және шетелдік бақылаушылар қатысатынын хабарлады. Бұл алдымыздағы сайлау демократиялық сайлау нормаларына сәйкес болатынының кепілі деп түсінеміз.
Сайлауға дайындыққа келсек, кезектен тыс сайлау болатыны туралы бұрын әр түрлі болжам айтылатын. Өйткені бұл науқан қазір елде жүзеге асырылып жатқан саяси реформалардың заңды жалғасы екені бәрімізге мәлім. Алдымыздағы президент сайлауынан кейін парламенттік сайлау болатыны заңды құбылыс. Яғни парламенттік сайлауға дайындалып жатқан саяси күштерге алдымыздағы президенттік сайлауға қатысу үшін өз көшбасшысын ұсыну қиынға соқпайды. Саяси үдерістің идеясына сәйкес саяси күштер әрқашан белсенді ұстанымына ие болуы керек, кез келген уақытта сайлау науқанына дайын болу үшін сайлаушылармен дұрыс жұмыс өткізу керек.
Наталья ДЕМЕНТЬЕВА,
Мәжіліс депутаты
