Ақын, Парламент Мәжілісінің депутаты, Халықаралық С.Есенин атындағы сыйлық – «Алтын күз» орденінің иегері, Халықаралық «Алаш» әдеби сыйлығының лауреаты Қазыбек Исаның 60 жасқа толуына орай туған жері Шардара мен Түркістан, Шымкент қалаларында мерейтойы аталып өтті. Ақынның Шардара қаласында өткен шығармашылық кешіне әдебиетші, филология ғылымдарының докторы Құлбек Ергөбек, Мәжіліс депутаты Серік Ерубаев, «Ақ жол» партиясы қаржылық-ревизиялық комиссиясының төрағасы Болат Өтепбаев, ақын Сұраған Рахмет, ақын Алмас Ахметбекұлы сынды зиялы қауым өкілдері мен өзге де қонақтар қатысты.
Кеш аудандық Мәдениет үйінің алдында орналасқан Абайдың ескерткішіне гүл шоқтарын қоюдан басталды. Сондай-ақ кешке қатысушылар Қ.Иса шығармашылығына арналған көрмені тамашалады. Іс-шара барысында жерлестері ақынға құрмет көрсетіп, ақбоз ат мінгізді. Сонымен қатар кешке келген ел ағалары мен арқалы ақындар құттықтау сөз сөйлеп, естеліктер айтып, арнау өлеңдерін оқыды. Кеште сөз алған аудан әкімі Қайрат Жолдыбай:
– Қазақ тілінің мәртебесін көтеру бойынша атқарылып отырған жұмыстарыңызды халық көріп, бақылап отыр. Қазір Парламент Мәжілісінде атқарып отырған жұмыстарыңызды ел-жұртыңыз шын жүректен қолдайды деп білемін. Еліміздің өсіп-өркендеуі, рухани түлеу, қазақ тілінің мәртебесін көтеру жолындағы қадамдарыңыз алға баса берсін. Ел алғысына бөлене беріңіз, – деп ақжарма тілегін білдірді.
Қалың көпшіліктің жүзінен туған топырағынан түлеп ұшқан ақынға деген алпамса сезім, ақ адал ықылас байқалады. «Бұл ән бұрынғы әннен өзгерек» дегендей, кеш құрылымы шынайы, әсерлі өтті. Кеш ортасында есімі қаламгер құрметіне Қазыбек деп қойылған он шақты бала шығып, ақын жырын жатқа оқыды. Мынадай құрметке арқасы қозып, көңілі тебіренген Қазыбек ақын өзі де балалардың ортасында тұрып жыр оқыды. Шіркін-ай, адам табиғаты, жүрегі, сезімі, ниеті дегенді қойсаңшы. Одан асқан қандай күш, қандай құндылық болуы мүмкін? Атақ сатып алсаң да, құрмет сатып ала алмайсың. Шардара халқының ақынға деген құрметі кісі көңілін толқытып, ойға қалдырды.
Мұнан соң ұзына созылған мерекелік шеру жолға шығып, Қазыбек Жарылқасынұлының туған ауылы Қызылқұмға бет алды. Жолай Ұзын ата кесенесіне бас бұрып, қасиетті бабамыздың, кесене маңындағы қазақ үшін қан қасап замандарда тер төккен батырларымыздың рухына Құран бағышталды. Қызылқұм ауылындағы ақын білім алған орта мектепте оқушылар шұрқырай қарсы алып, Қазыбек Иса атындағы сыныпта өлең оқылды. Қанатын қомдап, қияға ұшқан перзентін ұлықтаған білім ордасы сәруар сөз сөйлеп, алғысын жеткізді. Ізін ала Арыстан баб кесенесіне тәу еткен делегация киелі Түркістан қаласында болып, кеш жалғасын тапты. Алдымен келген қонақтар кітап көрмесін тамашалап, Түркістан мақамдары негізінде жарық көрген «Текті сөздің төресі» термелер жинағының тұсауын кесті. Одан соң мерейтой иесіне арналған «Тәуелсіздік тарландары» деректі фильмінің көрсетілімі өтті. Ақынның туған жері шағалалы Шардарадан бастау алып, Түркі әлемінің рухани астанасы Түркістанда жалғасын тапқан кешті ғалым, әдебиет сыншысы Құлбек Ергөбек жүргізіп отырды. Түркістан облысы әкімінің орынбасары Сәкен Қалқаманов өңір басшысының құттықтауын жеткізіп, ақынға құрмет көрсетті. Бұдан әрі Р.Сейтметов атындағы Түркістан сазды-драма театрының әртістері Қазыбек Исаның өлеңдерін нақышына келтіріп оқыды.
Мұнан соң мерейтой шырайлы Шымкент қаласында жалғасын тапты. Түркістан сарайы көрерменге толып, ақынның өлеңдері оқылып, әндері шырқалды. Қазыбек Исаның бірнеше өлеңіне ән жазған белгілі композитор Қалдыбек Құрманәлі қаламгердің кісілік келбетін ашып, ана сүтімен дарыған абзал қасиеттерін баян етті. Кеш соңы ақынның жаңа өлеңін оқуымен қорытынды-
ланды.
Ақындық – тылсыммен астасқан аспани әлем. Шын таланттың іргетасы әділет пен еркіндік, ар мен ұят, адамдық пен ынсап арқылы қаланбақ. «Ақын болу өз еркің, азамат болу міндетің» дегендей, Қазыбек Иса әділет үшін күресіп, ұлт құндылықтарын түгендеп жүрген ақын. Ақын жолы – кешегі сарғайып атып сәскеде сөнген Алаш арыстарының жолы, ардың жолы. Елім деп еміренген ағыл-тегіл бұл жүрек – туған жерінің түнгі оттарындай ұлт шаңырағына сәулесін түсіре берері талассыз ақиқат.
