Өткен аптаның соңында Қазақстанның әйелдер құрамасының бас бапкері Шәміл Сафиуллин Парсы шығанағында қай шәкірттеріне сенім артатынын жария етті. Аса жеңіл салмақта Алуа Балқыбекова бақ сынайды. Биылғы жылдың мамыр айында Түркияның Ыстанбұл қаласында өткен әлем чемпионатында жерлестеріміздің арасынан жалғыз Алуа ғана ақтық сынға дейін алқынбай жеткен еді. Сол жарысты Балқыбекова күміс медальмен қорытындылады. 50 кило салмақ дәрежесінде Назым Қызайбай рингке көтеріледі. Ол – ұлттық команда сапындағы ең белді боксшылардың бірі әрі бірегейі. Назымның екі дүркін әлем және Азия чемпионы деген атақтары бар. Дүниежүзілік доданың тағы біреуінде Қызайбай қола медальды мойнына ілді. Аса ауыр салмақта Ләззат Күнгейбаева айқасады. Ол 2016 жылғы әлем чемпионатында топ жарса, 2014 жылы күміске қол созды. Ләззат бұған дейін Азия біріншілігінде төрт рет жүлдегерлер қатарына қосылса, былтыр алтыннан алқа тақты. 75 кило салмақтағы Валентина Хальзова да кезінде әлемдік додада дараланған.
54 кило салмақта сынға түсетін Жайна Шекербекова мен 70 кило салмақта күш сынасатын Дариға Шәкімованың 2016 жылы Рио-де-Жанейрода алауы тұтанған Олимпия ойындарында өнер көрсеткенін жанкүйерлер жақсы біледі. Оңтүстік Америка сапарынан Дариға қола медальмен оралды. Оның алдында жерлесіміз Азия біріншілігінде екі рет бас жүлдені олжалады. Рио Олимпиадасының ширек финалында сүрінген Жайна әлем чемпионаттарында үш рет жеңіс тұғырына көтерілді. Ал өзге салмақ дәрежелерінде Жазира Орақбаева (52 кило), Римма Волосенко (60 кило), Аида Әбікеева (63 кило), Мәдина Нұршаева (66 кило) және Гүлсая Ержан (81 кило) шаршы алаңға шығады.
Естеріңізге сала кетейік, былтыр БАӘ-нің Дубай қаласында ұйымдастырылған Азия чемпионатында Қазақстан құрамасы 8 алтын, 1 күміс және 1 қола медаль иеленіп, жалпыкомандалық есепте жеке-дара көш бастаған еді. Тарқатып айтсақ, Алуа Балқыбекова (48 кило), Назым Қызайбай (51 кило), Дина Жоламан (54 кило), Римма Волосенко (60 кило), Милана Сафронова (64 кило), Валентина Хальзова (69 кило), Фариза Шолтай (81 кило) және Ләззат Күнгейбаева (+81 кило) бас жүлдені олжаласа, Владислава Кухта (57 кило) күміс алды. Ал Марина Вольнова (75 кило) қола медальды мойнына ілді.
Ал Қазақстаннан кейінгі екінші және үшінші сатыға Өзбекстан (1 алтын+5 күміс+2 қола) мен Үндістан (1+3+6 қола) құрамалары жайғасты. Сондай-ақ жүлде алған мемлекеттер қатарында Индонезия (0+1+0), Моңғолия (0+0+3), Тәжікстан (0+0+2), Филиппин (0+0+1), Шри-Ланка (0+0+1), Кувейт (0+0+1) және БАӘ (0+0+1) командалары бар.
