Жалаулы жарыстар

Теннис. Қазақстан теннисшілері  «Ролан Гаррос» турнирінің жарысы саналатын Франция ашық біріншілігіне қатысуда. Жарыстың алғашқы күні Ярослава Шведова бірінші айналымда америкалық Лауран Дависті 3:6, 7:5, 6:4 есебімен ұтты. Енді ол франциялық, әлемнің 213 ракеткасы Паулин Парментиермен кездеседі. Шведова жұптық және микст сынына да қатысады. Ерлер арасында Михаил Кукушкин бірінші айналымда Франция теннисшісі Николас Маюды 6:3. 6:7. 6:3. 6:4 есебімен жеңді. Оның келесі қарсыласы – әлемнің оныншы ракеткасы америкалық Джон Ишнер. Сол сияқты Александр Недовесов үндістандық Сомдев Девварманнан  5:7. 6:3. 7:6, 6:3есебімен басым түсті. Енді ол әлемнің алтыншы ракеткасы Томас Бердыхпен (Чехия) кездеседі. Андрей Голубев әлі ойнаған жоқ. Ол бірінші айналымда Энди Марреймен күш сынасады. Кәсіпқой бокс. Жақында қазақ боксшысы Қанат Ислам өзінің кәсіпқой бокстағы он жетінші кездесуін өткізіп, жеңіске жетті. Ол Колумбияда жергілікті боксшы Фран­сиско Кордероны ұтты. Кездесудің екінші раундында Қанат қарсыласын нокаутқа жіберді. Бұл Қанаттың кәсіпқой бокстағы 17 жекпе-жегіндегі 17-жеңісі. Ол бұған дейін өткізген айқастарының бәрінде қарсыластарын айқын басымдықпен жеңген. Ал Қанатпен кездес­кен Кордероның бұл үшінші жеңілісі. Қазір Қанат WBA тұжырымы бойынша орта салмақта (69,85 кг) рейтингінде 12 орында тұр. Оның салмағында әлемнің супер чемпионы америкалық Флойд Мэйуэзер көш бастап келеді. Қанаттың рингтегі лақап аты – «Қазақ».  Осы күндері ол АҚШ-тың Майами қаласында жаттығады. Бокс. Алматыда тұңғыш рет әскери қызметкерлер арасында 55-ші әлем чемпионаты өтеді. Жарыс Кеңес Одағының батыры, «Халық Қаһарманы», еліміздің  тұңғыш қорға­ныс министрі, армия генералы Сағадат Нұрмағанбетовті еске алуға арналады. Оған әлемнің 25 елінің, атап айтқанда Колумбия, Франция, Бразилия, Шри-Ланка, Оңтүстік Корея, Ресей, Голландия, БАӘ, Кувейт, Тунис, Грузия, Ирак, Нигерия және басқа да елдерінің боксшылары қатысады. Биылғы чемпионат 26 мамыр мен 4 маусым аралығында «Достық» спорт кешенінде өтеді.