Аймақтық фестиваль аяқталды

  Таяуда Павлодар қаласында аймақтық театрлар фестивалі өтті. Фестиваль қазақтың біртуар азаматы, қоғам қайраткері, жазушы, драматург Жүсіпбек Аймауытовтың 125 жылдығына арналды. Аймақ театрларының фестивалі ұлттық театр өнерінің іргетасын қалаушылардың бірі, қазақ өнерінің қаймағы Жүсіпбек Аймауытовтың рухына бағышталды. Артында өшпес мұра қалдырған, еліне аянбай еңбек еткен, «Ақбілек», «Қартқожа», «Мансапқорлар», «Шернияз», «Рабиға», т.б. көптеген туындылар қалдырған ұлы тұлғаның есімі ұлықталды. Ертістің бойын жайлаған Павло­­дар қаласындағы аймақтық фестиваль­ді Ж.Аймауытов атындағы қазақ му­зыкалы драма театры ұйымдастыр­ды. Театр директоры, ҚР-ның еңбек сіңірген қайраткері Н.Жұманиязовтың бас­шылығымен өткен фестивальге ай­мақтық театрлар атсалысты. Семей қаласынан Абай атындағы қазақ музыкалы драма театры Ш.Айтматовтың «Қош бол, Гүлсары», Ф.М.Достоевский атындағы орыс драма театры Жан-Батис Мольердің «Лекарь поневоле», Семейдің «Дариға-ай» жастар театры А.Айтыбаевтың «Ызғарлы желтоқсан», Жамбыл атындағы Шы­ғыс Қазақстан облыстық драма театры­ Ұ.Есдәулетовтің «Қара пима», Қ.Қуанышбаев атындағы мемлекет­тік академиялық қа­зақ музыкалық дра­ма театры Ә.Та­разидің «Үкілі жұл­дыз», С.Сей­фуллин атындағы Қараған­ды об­лыс­тық драма театры М.Кәрім­нің «Ай тұтылған түн», Бикен Римова атын­дағы Алматы облысы әкімінің Талдықорған драма театры Иран Ғайып­тың «Негізгі шаруа», А.Чехов атын­дағы Пав­лодар облыстық драма театры А.Гон­чаровтың «Без слез, без жиз­ни, без любви» драмаларын ұсын­ды. Аймақтық театрлар фести­валінің қазылар алқасы құрамында КСРО халық әртісі А.Әшімов, белгілі сыншы, профессор Ә.Сы­ғаев, ҚР-ның мәдениет қайраткері М.Байжұма­нов, ҚР-ның еңбек сіңірген әртісі Р.Тәжібаева, ҚР-ның мәдениет қай­раткері А.Қанафина сынды танымал тұлғалар болды. Бас жүлдені Қ.Қуа­нышбаев атындағы мемлекеттік ака­демиялық қазақ музыкалық драма театры иеленді. Басқа театрлар да өзіндік нақыш­тарымен ерекшеленді. Аймақ­тық театрлар фестивалінен құралақан қайтқан ешкім жоқ. Семейдің Абай атындағы қазақ музыкалы драма театры «Әдебиетті насихаттағаны үшін» аталымы бойынша марапатталды. Халық әртісі Б.Имахановтың театрдағы көп жылдық еңбегі ерекше аталып өтті. Ф.М.Достоевский атын­дағы орыс драма театрының әрті­сі А.Сухов «Үздік ер бейнесін сом­дағаны үшін» жүлдесімен мара­патталды. Семей қаласынан шығар­машылық ұжымды бастап бар­ған, Абай атындағы қазақ музы­калы драма театрының директоры Б.Түлеков пен Ф.М.Достоев­ский атындағы орыс драма театрының директоры Я.Горель­­ников өнер ұжымдарының аламан бәйгеге қатысуына ерекше еңбек сіңір­генін атай кеткен жөн. Мерей ҚАРТОВ, Абай атындағы қазақ музыкалы драма театры әдебиет бөлімінің меңгерушісі.