Соңғы жарыс күні ерлер үш және әйелдер екі салмақ дәрежелерінің жүлделерін сарапқа салды. Өкінішке қарай, татамиге шыққан балуандарымыздың дені алғашқы айналымнан аса алған жоқ. Атап айтсақ, Ермахан Әнуарбеков (90 кг) нидерландтық Йеспер Сминктен, Ерқанат Молдағұлов (100 кг) грузиялық Илья Суламанидзеден жеңілді. Тұсаукесер кездесуінде америкалық Кристиан Коновалды ұтқан Жамбыл Тұрғыналиев (100 кг) келесі белдесуінде әзербайжандық Жамал Гамзатхановқа жол берді. Жұбаныш белдесуінде жерлесіміз өзбекстандық Шахруххон Бақтиеровтың осал тұсын таба алмады.
Әйелдер арасында Аруна Жангелдина (78 кг) мен Назерке Тілеуханова (78 кг) ә дегеннен жарыс жолынан шығып қалса, Камила Берліқаш (78 кг) шешуші сында хорватиялық Тина Радичтен басым түсіп, қола медаль иеленді.
