Испания құрамасының атағы алысқа тараған. Кезінде олар Билли Джин Кинг кубогін бес мәрте олжалап, тағы алты рет финалда ойнады. Аталған жарыста қол жеткізген табысы жағынан Пиреней түбегі теннисшілерінің алдын орап тұрған үш мемлекет қана бар. Олар – АҚШ (18 жеңіс), Чехия (11 жеңіс) және Аустралия (7 жеңіс). Десек те кейінгі кездері испаниялықтардың шабысы біраз бәсеңдеп қалғаны байқалады. Олай деуге негіз, соңғы рет олар бас жүлдені сонау 1998 жылы олжаласа, финалға шықпағандарына бақандай 14 жылдың жүзі болды және де әлемнің бұрынғы бірінші ракеткасы Гарбинье Мугуруса Бланконың Шотландиядағы турнирге келмейтінін естігенде, кәдімгідей қуандық. Себебі ол – тым азулы қарсылас. Мугуруса 2016 жылы Ролан Гаррос пен 2017 жылы Уимблдонда алдына жан салмай, 2021 жылы WTA-ның қорытынды турнирінде жеңіске жеткенін жанкүйерлер жақсы біледі.
Сол кеште алғашқы болып кортқа Юлия Путинцева мен Нурия Парризас-Диас шықты. Испания өкілі бұрын-соңды халықаралық аренада елеулі табыстарға қол жеткізген емес. Биыл Нурия Мельбурнде өткен Аустралияның ашық біріншілігінің үшінші кезеңіне дейін жетті. Ең үздік нәтижесі осы. Оған қарағанда Юлияның бағындырған белестері әлдеқайда зор. Әлемдік рейтингте де жерлесіміз қарсыласынан 21 саты жоғары тұр. Сол себепті де 31 жастағы ардагер ойыншыдан айтарлықтай қауіп келеді деп еш ойламаған едік. Ал Парризас-Диас болса, ел намысы сынға түскен сәтте ширығып шыға келді. Алғашқы екі сетте таразы басы теңселіп тұрды. Біріншісінде Парризас-Диас басым түсті – 6:4. Екіншісінде Путинцеваның мысы басым болды – 6:2. Шешуші кезеңде екеуі де аянбай айқасты. Ойын тай-брейкке ұласты. Бұл ретте испаниялықтың бағы жанды – 7:6.
Ендігі бар үмітіміз Елена Рыбакинада еді. Бірден айта кетейік, ол өте азулы қарсыласқа тап болды. Тура төрт тәуліктен кейін 25 жасқа толғалы отырған Паула Бадоса 2021 жылы Ролан Гарростың ширек финалына шықса, 2022 жылы Аустралияның ашық біріншілігінің төртінші кезеңіне дейін жетті. WTA турнирлерінде үш мәрте топ жарды. Соның арқасында ол биыл көктемде әлемдік рейтингте екінші орынға дейін көтерілді. Қазіргі кезде Паула 13-орынды иеленуде. Жалпы, Бадоса мен Рыбакина өзара төрт мәрте шеберлік байқасып, соның үшеуінде алғашқысының асығы алшысынан түсті. Бұл жолы да испаниялық теннисшінің мерейі үстем болды. 2 сағат 05 минутқа созылған сайыс 6:2, 3:6, 6:4 есебімен аяқталды.
Жұптық сайыста Юлия Путинцева мен Анна Данилина Паула Бадоса мен Алена Большовадан 4:6, 2:6 есебімен жеңілді. Осы сәтсіздіктен кейін Қазақстан құрамасы жарыс жолынан шығып қалды. Енді жартылай финал жолдамасы үшін Ұлыбритания мен Испания құрамалары таласады. Ал Билли Джин Кинг кубогінің иегері 13 қарашада анықталады.
