Индустрия және инфрақұрылымдық даму министрлігінде «Ашық сағат алаңы» аясында мүдделі мемлекеттік органдармен бірлесіп аз қамтылған отбасыларға қаржылық және материалдық көмек көрсету қағидалары бойынша цифрлық платформаны енгізу мәселелері талқыланды.
Индустриялық даму комитетінің төрағасы Ілияс Оспановтың басшылығымен өткен кеңесте жобаны іске қосу мәселелері қарастырылып, қанатқақты жобаны алдымен Астана қаласында, кейін еліміздің барлық өңірінде енгізу жоспарланды.
«Қазіргі уақытта «Әлеуметтік әмиян» платформасы арқылы ата-аналарға белгілі бір дүкендерде мектеп формасын сатып алуға кепілхат беру мәселесі қарастырылуда. Сондай-ақ отандық тауар өндірушілерге мектеп формасын сату үшін жеңілдікті шарттармен сауда нүктелері ұсынылғаны жөн. Осыған байланысты отандық тауар өндірушілердің тізілімін қалыптастыру қажет. Басты талаптардың бірі – ұлттық стандарттарға сәйкес өнім өндірісін анықтау», деп атап өтті І.Оспанов.
Жоба нәтижесінде бюджет қаражатын нысаналы мақсатта жұмсаудың ашықтығы қамтамасыз етілетіндігі, сондай-ақ мектеп формасын шығару бағытындағы отандық өндіріс көлемін арттыруға ықпал жасалатыны шынында қуанышты жайт. Аз қамтылған отбасыларға қаржылық және материалдық көмек көрсету қағидалары аясында киім, аяқкиім, мектеп керек-жарақтарын сатып алуға көмек ата-аналардың өтінішіне сәйкес ең төменгі күнкөріс деңгейінен төмен емес мөлшерде ақшалай берілетінін атап өткен жөн.
Әрине, әр баланың қатарынан қалмай өсуіне барынша жағдай жасау, мейлінше көңіл бөлу – қай ата-ананың болсын мерейін асырары сөзсіз. «Бақыт деген – менің бала күндерім» деп Мұқағали жырлағандай, балалық шақ әркімнің жадында тек қызықты да бақытты сәттерімен есте қалуға тиіс.
