Спорт • 25 Қараша, 2022

Чемпион оқушылар

33 рет көрсетілді

Әлемдік додада жүлделі болу үшін спортшыға үлкен жүрек қажет. Бұл – мектепте оқып жүріп, үлкен спортқа үйір болған оқушы үшін де басты міндет. Мұны Талдықорғандағы Назарбаев зияткерлік мектебінің шәкірттері жақсы түйсінеді. Оған Біріккен Араб Әмірліктерінде джиу-джитсуден жеңімпаз болған жастар дәлел.

Ашық чемпионат Абу-Дабиде өтті. Аталған додаға әлемнің түкпір-түк­пірінен бес мыңнан астам спортшы қатысты. Бұл додада біздің жас балуан­дардың да бағы жанды. Сол байрақ­ты бәсекеде джиу-джитсуден Аңсар Несіп­қали мойнына алтын тақса, Кабир Әлім­ханов күміспен күптелді. Ал Айат Маманов қола медальды қанжыға­сы­на байлап қайтты.

5-сынып оқушысы Аңсар Несіпқали мұндай ауқымдағы чемпионатқа бірінші рет қатысып отырған жоқ. Ол жеңіске жететіне еш күмәнданбаған. Жас спортшы өткен жылы Мәскеуде де өнер көрсетіп, жүлдегерлер қатарынан табылған еді.

«Мен джиу-джитсумен төртінші жыл айналысамын. Түрлі жарыс­тарда бақ сынап, өзімді көрсеттім. Бұл додада бес жекпе-жек өткіздім. Менің бәсекелестерім Әзербайжан, Иран, БАӘ елдерінен келген джитсерлер болды. Бәрін де жеңіп, алтын медальға қол жеткіздім», дейді А. Несіп­қали.

Оның жан досы 4-сынып оқушысы Кабир Әлімханов екінші орынды місе тұтса да, әлі талай жеңіске жетеріне се­німді. Халықаралық чемпионатқа ал­ғаш рет қатысып отырған ол, үздік үштік­тен көрінудің өзі үлкен жетістік екенін жеткізді.

«Мен ұмытылмас эмоцияларды бастан өткердім. Осы жеңісімді, қуа­ны­шымды анама арнаймын. Бізді дайын­даған бапкерлеріме үлкен алғысымды айтамын. Қатты тырыстым, келесі жылы бұдан да жақсы нәтиже көрсетемін деген үміттемін», дейді К. Әлім­ханов.

Ал мойнына қола тағып, жетісу­лықтарды желпінткен Айат болса сәл дайындықтың аздау болғанын жасырмады. Ол да келер жылы әнұранымызды шырқатуға асық.

«Біздің оқушылардың халықара­лық аренадағы өнері қазірдің өзінде үлкен жетістік деп есептеймін. Әріп­тесім Ернұр Нұрмұханов екеуміз барынша үздік нәтижеге ұмтыламыз. Сондықтан джиу-джитсуден мектептегі дайындықпен қатар, балалар аптасына екі рет қаланың спорт секцияларында жаттығады. Бұл чемпионатта біздің жасөспірім жігіттер тәжірибе мен болашақ жеңістерге мотивация алды», дейді жаттықтырушы Айдос Дүйсентаев.

Назарбаев зияткерлік мектебінің джиу-джитсу үйірмесі 2013 жылдан бері жұмыс істейді. Осы жылдар ішінде талай оқушы халықаралық, республика­лық жарыстарда чемпион атанды. Жар­қын мысал ретінде «Astana Open» халық­аралық грэпплинг турнирінің жеңімпаздары атанған Ернар Өмірзақов пен Владимир Канды айтуға болады.

 

Жетісу облысы

Соңғы жаңалықтар

Ұқсас жаңалықтар