Бұл туралы елдегі Мұғалімдер кәсіподақ ұйымының зерттеуінде айтылған.
Ақпаратқа сәйкес, ұстаздар бос уақытында такси жүргізушісі және бармен болып қосымша табыс таба бастаған. Репетитор болып жүргендері де көп.
Тіпті, алғашында аз қамтылған отбасылардан шыққан оқушыларға көмек көрсету мақсатында білім беру мекемелерінде құрылған азық-түлік банктерінің қызметтерін пайдаланатын мұғалімдердің де қатары көбейген.
Осыған байланысты билік мұғалімдердің жалақысын 5-8 пайызға көтерген. Бірақ жылдық есеппен 11 пайыздан асатын инфляцияны ескерсек, оларға бұл көмектеспейтін тәрізді.
Ұлыбританияның Ұлттық статистика басқармасының мәліметі бойынша, елдегі инфляция қазан айында өткен жылдың сәйкес кезеңімен салыстырғанда 11,1%-ға дейін өскен. Бұл 1981 жылдан бергі ең жоғары көрсеткіш. Бағаның көтерілуіне электр энергиясы тарифінің қымбаттауы әсер еткен.
Айта кетейік, бұған дейін Лондонда орналасқан Экономика және іскерлік зерттеулер орталығы Ұлыбританияда өмір сүру деңгейінің төмендеуі мүмкін екенін хабарлады.
