Медицина • 05 Желтоқсан, 2022

Жасанды жүрек те өмірді ұзартады

Бұған дейін «Жүректі механикалық қолдау» бағдарламасы Астанадағы Ұлттық кардиохирургия ғылыми орталығында енгізілсе, енді Алматыдағы Кардиология және ішкі аурулар ғылыми-зерттеу институты да 60 жастағы пациентке жүректің жасанды сол жақ қарыншасын (LVAD) импланттау операциясын сәтімен атқарды. Бұл операцияны Алматы кардиохирургтері Астанадағы Ұлттық кардиохирургиялық ғылыми орталығындағы әріптестерімен бірге жасады.

Айнаш ЕСАЛЫ

«Көмекші механикалық құрылғы – шунттеу, клапандарды протездеу, кардиостимуляторды имплантациялау немесе дәрі-дәрмекпен емдеу сияқты басқа ем түрлері көмектесе алмайтын жүрек ауруының ауыр немесе терминалдық сатысындағы пациенттерге салынады», деді КІАҒЗИ кардиохирургия бөлімшесінің меңгерушісі Рүстем Төлеутаев.

Мамандар қазір жер бетінде 26 миллиондай адам жүрек қызметі жеткіліксіздігінен қиналатындығын айтады. Пациенттердің 20 пайызында ауруы асқынып кетеді. Осы дерттің салдарынан жыл сайын 1 млн адам аурухана төсегіне таңылады.

Қарапайым тілмен айтқанда, бұл кеселді жүрек бұлшықетінің ағзаны қан мен оттегіге қажеттілігін қанағаттандыру үшін жеткілікті мөлшерде қан айдай алмайтын созылмалы, өрши беретін ахуал. Науқасты ентігу, кеуденің қысылуы, аяқтың ісінуі, бүйрегі мазалайды. Мұның соңы асқына келе ажал құштыруы мүмкін. Сондықтан созылмалы жүрек функциясының жеткіліксіздігі қатерлі ісіктен кейінгі өлім-жітімге жетелейтін аурулардың басында тұр. Ал LVAD имплантациясы ауыр СЖЖ диагнозы қойылған науқастарды емдеудің жаңа дәуірі десек те болады.

«Имплантацияланатын жүрек сорғысы жүрекке қанды бүкіл ағзаға айдауға көмектеседі және СЖЖ белгілерін жеңілдетеді. Осыдан кейін жүрек қызметі жақсарып, науқасқа жүрек трансплантациясын күтуге мүмкіндік береді. Кейбір науқастар үшін бұл өмірді ұзартудың жалғыз мүмкіндігі. Біз жүрекке жоғары технологиялық операциялардың барлық түрін жасаймыз. Келешекте жүрек патологиясын емдеудің жаңа заманауи әдістерін ұлғайтуды және одан әрі енгізуді жоспарлап отырмыз», дейді Кардиология және ішкі аурулар ҒЗИ басқарма төрағасы, профессор Роза Қуанышбекова.

Клиника басшысының айтуынша, екі түтігі бар, біреуі қолқаға, екіншісі жүректің сол жақ қарыншасына қосылған шағын сорғы сол жақ қарыншаның қызметін атқарады. LVAD өмірді ұзартуға, бұрынғы қалпына оралуға мүмкіндік береді. Жасанды жүрегі бар науқастың басқа адамдардан айырмашылығы – оның тамыр соғысы болмайды.

Алматыда ең бірінші болып жүректің жасанды қарыншасы салынған Алматы облысының 60 жастағы тұрғыны Ғаппар Қалиевқа 2020 жылы кардиовертер-дефибриллятор имплантацияланған. Басқа да қосымша аурулар мазалаған науқасқа жасалған бұл операция да сәтті өтті.

АЛМАТЫ