Ендігі кезекте Алматы қаласы бойынша Кәсіби даму институтының қызметкерлері жұмысын осы институт құрамында жалғастырады. Қазір филиалдың педагогикалық құрамы толығымен және 5 қызметкер жұмысқа орналасып, 4 маман қысқарған.
Аталған жағдайға байланысты алаңдаушылық білдірген филиал қызметкерлері журналистермен кездесіп, пікірлерімен бөлісті. Филиалдың жабылуы туралы шешіммен қызметкерлер осы жылдың 22 қарашасында ғана хабардар болған. Филиалдың білікті мамандары жұмыссыз қалуға алаңдамайды. Алайда қыстың көзі қырауда жеткен тосын жаңалық 20 жылдан астам тәжірибесі бар мамандардың ертеңге деген сенімінен айырып отыр. Енді қолға алған жобалардың барысы қалай болады деген филиал қызметкерлері «Ұстаздар үйінің» қалыпты жағдайда жұмысын жалғастырғанын қалайды.
«Өрлеу» біліктілікті арттыру ұлттық орталығы» АҚ филиалының Алматы қаласы бойынша директоры, педагогика ғылымдарының докторы Раиса Садвакасова атап өткендей, мұғалімдердің біліктілігін арттыру мақсатында құрылған 60 жылдық тарихы бар «Ұстаздар үйінің» мамандары осы жылдар ішінде біліктілікті, кәсіби құзыреттілікті арттыруда көптеген жобаның ұйытқысы болып келді. Биыл 6 мыңға жуық мұғалім біліктілік курстарынан өткен. Орталықта 41 маман жұмыс істейді. Мұғалімдерге әдістемелік қолдау көрсету, мектепке дейінгі, жалпы білім беру және колледждердің оқытушыларымен бірлесіп жұмыс істеу де филиал мамандары үшін дәстүрлі шараға айналған.
«Филиал мемлекеттік тапсырысты орындаумен қатар басқа да жобалармен айналысып келді. Филиал мамандары биыл 27 млн теңгеге ақылы курстар өткізген. Сонымен қатар АҚШ елшілігі, ЕҚЫҰ гранттық жобалары аясында ағылшын тілі курстары, аз санды халықтар тілдерін қолдау бойынша жобаларға қатысты. 2019 жылдан бастап орыс тіліндегі балабақшалармен келісімшартқа отырып, қазақ тілін оқыту бойынша әдістемелік қолдау көрсетіп келеді. Биыл ЕҚЫҰ-мен бірлесіп, аймақтық мектептер жобасын іске асырды. Бүгінде филиал жұмысынан Орталық Азия аймағы хабардар. Саха Республикасы, Тәжікстан, Қырғызстан, Моңғолия педагогтерінің біліктілігін арттыра отырып, қазақ диаспоралары тұрып жатқан елдерде қазақ тілін оқытудың әдістемесі үйретілді. Пандемия кезінде Қырғызстанның республикалық біліктілігін арттыру институтымен және Моңғолияның мұғалімдері үшін тілді оқытудың интеграцияланған курсы қашықтан оқытылды», деді Р.Садвакасова.
Біз «Өрлеу» БАҰО» АҚ филиалы Алматы қаласы бойынша Кәсіби даму институтында іске асқан жобалардың бірқатарын ғана тілге тиек етіп отырмыз. Институт мамандарының айтуынша, ендігі кезекте педагогикалық ұжымдармен жасалған келісімшарттар аяқталмай қалуы ықтимал. Филиал жұмысының әрі қарай тоқтаусыз жалғасын табатынына сенім білдірген аға оқытушы, халықаралық тренер Лариса Петрова бүгінде ұстаздар қауымы үшін тұрақтылық пен қолдаудың маңызды екенін алға тартса, кафедра меңгерушісі Жанар Ибраева гуманитарлық пән мұғалімдерінің біліктілігі бойынша жобаларға тоқталды. Оның айтуынша, кафедрада білікті, тәжірибесі мол халықаралық сертификаттардың иегерлері, оқулық авторлары бірлесіп жұмыс істеп келеді. Осы орайда филиалда іске асқан жобалар жалғасын табуы үшін жарты ғасырдан астам тарихы бар институттың жұмысы жандануы қажет деп санайды. Бүгінге дейін жүйеленіп, бір бағытқа түскен көптеген жобаның тоқтап қалуына алаңдаушылық білдіре келіп, қала мұғалімдері үшін де бұл қиын кезең екенін атап өтті. Өйткені мұғалімдер жыл он екі ай әдістемелік семинарлар, көшпелі сабақтар, шеберлік сағаттары аясында өз біліктіліктерін шыңдап келген еді. Бірлескен авторлық жұмыстар, әдістемелік нұсқаулықтар да әзірленді.
Бөлім басшысы Аида Отыншина «Педагогтер мәртебесінің артуымен белгілі бір себептермен кетіп қалған қаншама білікті мұғалімдер білім беру саласына қайта оралды. Филиал мамандары мұғалімдерді қайта оқытып, біліктілігін көтеруге ықпал етті. Осы жылдарда қалыптасқан оқыту жүйесі, тренерлердің еңбегі еш кетпесе екен. Қиындықтарды артқа тастай отырып, қол жеткен нәтижемізде қаншама маманның еселі еңбегі жатыр», деген ойымен бөліссе, бас әдіскер Перуза Өзенбекқызы қызметкерлердің еңбегін әп-сәтте жоққа шығарып, 60 жылдан аса тарихы бар институтты жабу үлкен қателік деп санайды. «Осы жылдарда маңдай терін төге жүріп филиал қызметкерлері игі жобаларды іске асырды. Қалыптасқан дәстүрлі жүйені бұзбай, керісінше қолдау көрсетіп, үлгі-өнегесін таратып, дамытса, мұғалімдердің біліктілігін арттыруда үлкен жетістік болар еді. Институтты жабу дәстүрлі жүйені бұзумен пара-пар», дейді П.Өзенбекқызы.
2016 жылы жаңа ғимаратқа көшкен институт мамандары заманауи үлгіде жабдықталған кеңселерде мұғалімдердің білім алуына, тәжірибе жинақтауына барынша қолдау көрсетіп келеді. «Өрлеудің» бастамасымен атқарылған ізгі де игі іс-шаралар мұғалімдерді жаңашылдыққа жетеледі. Пандемия кезінде республика мұғалімдерінің қашықтан оқу режімінде тиімді жұмыс істеуіне «Өрлеу» мамандарының еңбегі зор. Мұндағы роботтехника, монтессори кабинеттері, кітапхана және мұражай ғимараттың заман ағымына сай екенінің дәлелі болса керек.
«Алматы филиалын жабуға неліктен осындай шешім қабылданды?» деген сауалымызға орай «Өрлеу» БАҰО» АҚ басқарма төрағасы Әсел Мұхаметжанова: «Бұл – нақты тұжырым емес. Біз «Өрлеу» біліктілікті арттыру ұлттық орталығы екі филиалының бірігуі туралы айтып отырмыз, сонымен қатар 100 пайыз мемлекет қатысатын акционерлік қоғамбыз. Қазір Алматыда екі филиал бар. Бірі мектеп, балабақша директорларының біліктілігін арттырса, екіншісі педагогтерді оқытады. Екі бөлек ұйымның әкімшілік және басқа да шығыстары бар, екі филиалды ұстау бюджетке ауыртпалық әкелетінімен келісерсіз. Бұл екі филиал үлкен шығынды қажет етеді, жыл сайынғы шығын 100 млн теңгеден асады. Сондықтан филиалдар біріктіру арқылы оңтайландырылды. Осылайша, әкімшілік шығыстары қысқартылады. Бұл шешім «Акционерлік қоғамдар туралы» заң мен біздің ұйымның жарғысы негізінде қабылданды. Яғни Директорлар кеңесі Алматы қаласы бойынша институтты жабу және функциясын Республикалық кәсіби даму институтына беру туралы шешім қабылдады», деп жауап берді.
АЛМАТЫ
