Бүгінгі таңда «Қазақанимация» шығармашылық бірлестігі конкурстық негізде республиканың ірі қалаларынан мәлімделген 167 сценарий ішінен үздік жиырмасын таңдап, 5 минуттық анимациялық картиналардан тұратын 20 жобаны аяқтап үлгерді. Осыған орай Қазақстанның Мәдениет және спорт министрі Дәурен Абаев «Қазақанимация» шығармашылық бірлестігінің жұмысымен танысып, анимация өнерін өркендетуге атсалысқан бірқатар ардагерді марапаттады.
– 2022 жыл ұлттық анимациялық кино өнері үшін айтулы жыл болды. Себебі биыл қазақ анимациялық кино өнеріне 55 жыл толды. 1967 жылы қазақ мультипликациясының негізін қалаған ұлы режиссер Әмен Қайдардың «Қарлығаштың құйрығы неге айыр?» атты тұңғыш фильмінен бастау алған қазақ анимациялық кино өнері жас ұрпаққа жарты ғасырдан астам уақыт бойы толассыз қызмет етумен келеді. Осы жарты ғасырдан астам уақыт ішінде 200-ден астам мультфильм түсіріліп, 30-дан аса анимациялық студия өмірге келген екен. Бұл ұлт болашағы үшін жасалған теңдессіз жұмыс, ауқымды еңбек деп есептейміз. 2018 жылы анимациялық киностудиялар қауымдастығы құрылып, өз кезегінде рухани мәдени маңызы бар көптеген іс-шараны атқарып келеді, – деді Мәдениет және спорт министрі Дәурен Абаев құттықтау сөзінде.
Сондай-ақ биыл қазақ анимациялық шығармашылық бірлестігінің ұйытқы болуымен Алматы, Астана, Шымкент, Түркістан, Петропавл қалаларында орналасқан 20 студияның әрқайсысы 20 анимациялық жобаға ие болды. Мұның барлығы ұлттық анимацияны қолдау жолында қолға алынған ірі жобалар-тұғын. «Ұлт болашағы – ұрпақ тәрбиесінде», анимациялық фильмдерді мемлекет мүддесімен ұштастыра отырып өскелең ұрпаққа ұлттық рух пен рухани құндылықтарды дәріптеу ісі толассыз атқарыла бермек. Дәурен Әскербекұлы анимацияның образ қалыптастыратынын айрықша атап өтті. Бала бойына ел тарихының, ұлттық дәстүр мен төл мәдениеттің образы анимация арқылы сіңеді. Тәрбие осылай бастау алады. Сол себепті анимацияны мемлекет тарапынан қолдау жыл сайын күшейе түсуі керек.
Іс-шара барысында Мәдениет министрі анимация ардагерлеріне марапаттар мен Алғысхаттар табыс етті. «Еңбек ардагері» медалімен кинорежиссер-мультипликаторлар Гүлмира Садықова мен Галина Дусенко және суретші-мультипликатор Эрнст Бейсеитов марапатталды.
Бұдан басқа, осы жылдың 19 қыркүйегі мен 4 қарашасы аралығында «Қазақанимация» шеңберінде өткізілген шеберлік сыныптарының тыңдаушылары және Польша, Франция, Түркия, Испания секілді алыс шетелдерде шеберлік сыныптары мен практикалық сабақтардан өткен тыңдаушыларға арнайы сертификаттар табысталды. Мәдениет министріне «Қазақанимация» шығармашылық бірлестігі аясында жасалған 20 жоба таныстырылды. Сонымен қатар қазақстандық мультипликаторлар анимация саласындағы халықаралық әріптестерімен меморандумдарға қол қойды.
Алдағы жылы ұлттық анимация өнерінің атасы Әмен Қайдардың туғанына 100 жыл толмақ. Соның айғағындай осынау ғасырлық мерейтой қарсаңында «Қазақанимация» шығармашылық бірлестігінде Ұлттық киноны қолдау мемлекеттік орталығының тапсырысымен «Әмен ағаның ғажайып бәйтерегі» атты қысқаметражды мультфильм түсірілді.
