Қасиетті Семейдің Қайнар ауылынан түлеп ұшқан өнерлі өрен болмысына, суреткерлік көзқарасына Алаш арыстарына құт мекен болған киелі топырақтың құты қонып, рухы дарығандай. Оны Фархад қолтаңбасынан шыққан әр спектакль айшықты дәлелдеп береді. Қуантарлығы сол, жас режиссер қандай қойылымды қолға алсын, оның әрқайсысының астарында ұлттық рух пен қазақы болмыстың иісі аңқып тұрады. Сонысымен де Фархадтың сахнадағы ізденісі ешқашан көзіқарақты көрермен назарынан тыс қалған емес, сезімі бар талғампаз қауымды селт еткізбей өткені сирек. М.Әуезовтің «Қарагөзі», І.Жансүгіров «Құлагер», Х.Алтай мен Х.Оралтай «Алтайдан ауған ел», У.Шекспирдің «ІІІ Ричард» пен «Лир патшасы», Б.Соқпақбаев «Менің атым Қожа», Ә.Нұршайықов «Махаббат, қызық мол жылдар» шығармалары негізінде жазылған туындылар жас режиссер табиғатын жан-жақты танытатын тіні мықты, рухы биік, көркемдік деңгейі жоғары табысты жұмыстар санатында.
Әсіресе Фархад қолтаңбасында көрерменімен қауышқан «Құлагердің» орны ерек. Ондағы Құлагер тағдыры арқылы берілген Алаш арыстарының өкінішке толы өмірі мен сахналық астарлы айшықтау тәсілдері һәм символдық сөйлету тілімен кестеленген көркемдік шешімдер көрушісін бір сәт те бейжай қалдырмайды. Керісінше жан әлеміңді әлемтапырық күйге түсіріп, көкірегіңе ащы өксік тығады. «Қарагөзі» де дәл солай. Ал «Махаббат, қызық мол жылдар» мен «Менің атым Қожадағы» романтикалық һәм лирикалық атмосфераны сезіну үшін аталған қойылымдарды тек сахнадан барып көру керек.
Ғ.Мүсірепов атындағы Қазақ мемлекеттік академиялық балалар мен жасөспірімдер театры сахнасына соны серпін әкелген У.Шекспирдің «Лир патшасы» – ол өз алдына бөлек әңгіменің арқауы. Режиссердің айтулы жұмысы кәсіби театр сыншылары мен өнер мамандарының бағалауымен жыл соңында Мәдениет және спорт министрлігі тарапынан тағайындалған өнер саласындағы тұңғыш ұлттық сыйлық – «Umai» үздіктерінің қатарынан көрінді.
Бұл – Фархадтың алғашқы жүлдесі емес. Бұған дейін де талай фестивальдерде топ жарып, талантымен көпті таңдай қақтырып жүрген талантты жастың әр жұмысы қалың көрерменнің жіті назарында.
Оның айқын дәлелі – Фархад Мәскеу театр мамандарымен шығармашылық тығыз қарым-қатынаста. 2017 жылы «ТМД, Балтық елдері және Грузия жас режиссерлері зертханасына қатысып, пайдалы дәрістен шабыттанған суреткер өзінің жеке «StarDrama» шығармашылық зертханасын ашты. Зертхананың алғашқы қойылымы 1986 жылғы Желтоқсан көтерілісі туралы «86» саундрамасы болды. Айтулы шығарма «Откровение» фестивалінде сілкініс тудырып қана қоймай, Румынияға жолдама алды. Сондай-ақ жас дарын ГИТИС Ресей театр өнері университеті ұйымдастырған VIII Халықаралық студенттік өз бетінше режиссерлік жұмыстар байқауында қазылар төрелігіне Оралхан Бөкейдің «Шырағың сөнбесін» және Уильям Шекспирдің «ІІІ Ричард» қойылымдарын ұсынып, Гран-при жүлдесін қанжығасына байлады. ГИТИС марапатын режиссер «Энергиясы, темпераменті және режиссерлік ойлаудағы айрықша қолтаңбасы» үшін жеңіп алды.
Өзінің жастығына қарамай Фархат Молдағали бүгінде іргелі өнер ордасы – Ғ.Мүсірепов атындағы Қазақ мемлекеттік академиялық драма театрының көркемдік жетекшісі, Мемлекеттік «Дарын» жастар сыйлығының лауреаты, Тұңғыш Президент қоры стипендиясының иегері. Қара шаңырақта қайталанбас туындыларын өмірге әкеліп қана қоймай, жастар театрының көркемдік кемелдікке ұмтылуына да қалтқысыз қызмет етіп келеді.
