«Егер бұрынғы қабылдау бөлімі тәулігіне 300 науқас қана қабылдай алса, қазір бұл көрсеткіш 500 пациентке дейін өсті. Ендігі жерде бөлім қызметкерлері жылына 100 мың науқасқа тәулік бойы көмек көрсете алады. Қабылдау бөлімі әлемде қабылданған ең жоғары заманауи стандарттарға сай салынып, жабдықталған. Озық емдеу-диагностикалық құрал-жабдықтардың ішінде КТ, рентген аппараты, ультрадыбыстық аппараттар, бейнефиброгастроскоп, анестезия, тыныс алу аппараттары да бар», дейді Алматы қалалық қоғамдық денсаулық сақтау басқармасының басшысы Иран Шәметеков.
Сондай-ақ мұнда автономды желдету жүйесі, бактерицидтік сүзгілер, операциялық бөлімшеге арналған тәуелсіз желдету жүйелері, жылыту және ауасы бапталатын жансақтау бөлмелері мен қарқынды терапия бөлімдері бар. Ең бастысы, науқастарға бар жағдай жасалған, емделуге байланысты жеке ақпараттарды құпия ұстау қарастырылған.
Жедел травматология бөлімшесінің кіреберісі бөлек. Мұнда жол-көлік апаты, өндірістік немесе басқа да жазатайым оқиғалар салдарынан ауыр жарақат алған науқастарға машықтанған мамандар жедел көмек көрсетеді.
Ғимарат жаңа санитарлық ережелерге, триаж аймағының нормаларына сәйкес қызыл, сары және жасыл аймақтарға бөлінеді, бұлар тиісті түсті бағыттауыштармен белгіленген. Сол сияқты күре жолдан кіретін жәрдем көліктерінің кедергісіз, еркін кіріп-шығуы, науқастарды әкелетін арбаны алып жүруге арналған пандустың ыңғайлылығы да қарастырылған.
Аталған ауруханаға қатысты 2023 жылдың тағы бір жаңалығы – жаяу бара алатын қашықтықтағы тұрғындар білікті дәрігерлерден медициналық көмек ала алуы үшін бірқатар жаңа медициналық ұйым ашу жоспарланып отыр. Мәселен, жаңа жылдың бірінші тоқсанында Әуезов пен Жетісу аудандарындағы «Мамыр» және «Кемел» отбасылық дәрігерлік амбулаторияларын пайдалануға беру, сондай-ақ Алматы қаласы Балалар жедел медициналық көмек көрсету орталығының кеңейтімін пайдалануға беру жоспарланған.
АЛМАТЫ
