Павлодар облыстық көркемсурет музейі бұдан былай Халық суретшісі Нағымбек Нұрмұхаммедовтің есімімен аталады. Қуанышты оқиғаға орай қылқалам шеберінің суреттерінен көрме ұйымдастырылып, түрлі тақырыптағы картиналар көпшілікке көзайым болды.
Нағымбек Нұрмұхаммедов көзінің тірісінде отандық бейнелеу өнері мен көркемсурет мәдениетін дамытуға баға жетпес үлес қосқан жан. Ол – Екінші дүниежүзілік соғыстың ардагері, Қазақ КСР Халық суретшісі, өнертану ғылымдарының кандидаты, Ш.Уәлиханов атындағы Қазақ КСР Мемлекеттік сыйлығының лауреаты. Суретші 1924 жылы Баянауыл ауданының Сайтанды деген жерінде дүниеге келген. Майдан даласынан аман-есен оралған соң 1947-1953 жылдары Ленинградтағы Илья Репин атындағы кескіндеме, мүсін және сәулет институтында профессор Р.Р.Френцтің жетекшілігімен білім алған. 1959 жылы Алматыға көшіп, Өнер академиясын тәмамдады. Негізінен реализм және импрессионизм бағыттарында ізденіп, көптеген портрет пен пейзажды, тарихи тақырыптағы картиналарды салған.
Өңірдегі Суретшілер одағы қоғамдық бірлестігінің төрағасы Өсербай Шұранов атап өткендей, суретшінің бүкіл шығармашылығы үлкен кенептерге түсірілген кескіндемелердің еркіндігімен, түстер үйлесімділігімен, тақырыпқа психологиялық тұрғыдан бойлауымен, бейнелердің лирикасымен ерекшеленеді.
– Нұрмұхаммедов қазақ даласындағы қарапайым адамдардың еңбегін бейнелеуді ерекше жақсы көрді. Абай Құнанбайұлы, Әбілхан Қастеев, Сапарғали Бегалин, Тоқаш Бокин, Мәлік Ғабдуллин, Талғат Бигелдинов сияқты танымал тұлғалардың портреттерін салған. Жеті жасында әкесі қайтыс болып, Новосібір, кейін Алматыда жетімдер үйінде тәрбиеленген. Білім алуына Қазақ Ғылым Академиясының негізін салушы Қаныш Сәтбаев көп көмек көрсетіпті. Жазушы Қалмұқан Исабаев естелігінде келтіргендей, бірде Қаныш ағаның кабинетінде отырса, бір жас жігіт кіріп келіп, сәлемдесіп кетеді. Әлгі жігітті одан кейін де бірнеше рет көреді. Тегін емес екенін білген қаламгер «Бұл бала кім?» деп Қанекеңнең сұрайды ғой. Қаныш ағамыз: «Бұл – Нағымбек деген жас суретші. Ата-анасының қолынан дәм татқан едім. Қазір әке-шешесі қайтыс болды, ешкімі жоқ, сондықтан қарайласып жүрмін», деп айтқан екен. Сол жас жігіт кейін өнерімен дүйім одаққа танымал болады. Осындай атақты жерлесіміздің есімі облыстық көркемсурет музейіне беріліп отырғаны бізді айрықша қуантты, – дейді Ө.Шұранов.
Суретші көзінің тірісінде отандық өнер тарихын зерттеп, «Қазақстан өнері», «Қазақстан графикасы», «Қожа Ахмет Ясауи мавзолейі», «Қазақстан суретшілері – Екінші дүниежүзілік соғысқа қатысушылар» деген еңбектер жазды. Франция, Бразилия, Жапония елдеріне шығармашылық сапармен барып көрмелер ұйымдастырған, суреттер топтамасын жасаған. Салған картиналары Канада, Бельгия, Югославия, Финляндия көрмелерінде қойылды. Қазақстанның бейнелеу өнері жөнінде кітаптар мен альбомдар шығарды. «Еңбек даңқы ерлері» топтамасы ҚазКСР Мемлекеттік сыйлығын алған.
Көрмеде қылқалам шеберінің 27 туындысы ұсынылды. Алматыдан арнайы келген Мара Нағымбекқызы көркемсурет музейіне әкесінің екі картинасын сыйға тартты.
«Әкем туған топыраққа бірінші рет аяқ басып тұрмын. Шаһарда Нағымбек Нұрмұхаммедовтің шығармашылығы бейнеленген аялдама барын көріп, керемет толқыдым. Жерлестері суретшінің еңбегін ұмытпай, жас ұрпаққа оның бай сурет галереясынан ақпарат ұсынып, танытуы өңірдегі мәдениет саласы басшылығының дұрыс бағытта жұмыс істеп отырғанын көрсетсе керек. Музейге есімі берілетінін естігенде айрықша қуандым. Жергілікті мәдениет мекемелеріне алғысым шексіз. Әкем еңбексүйгіш жан еді. Адамдармен араласқанда ақиқатты айтқанды ұнататын», дейді қылқалам шеберінің қызы Мара Нағымбекқызы.
ПАВЛОДАР
