Ал Астана, Алматы сияқты ірі қалалардағы білікті дәрігерлерге қаралғысы келетіндер еліміздің барлық түкпірінен табылады. Осы орайда Алматыдағы Президент Іс басқармасы медициналық орталығы – Орталық клиникалық ауруханасының бір топ дәрігері Ақтөбе қаласында «Қазақстан Республикасы Президенті Іс басқармасы медициналық орталығының күндері» аясында табысты жұмыс істегенін атап өтуге болады.
Осылайша, білікті дәрігерлердің елдегі денсаулық сақтау ісіне жаңа заманауи әдістерді енгізу мақсатында қолға алған бастамасы еліміздің батыс өңірінен басталды. Алғашқы күні ОКА нейрохирургия бөлімшесінің меңгерушісі Марат Саршаев Ақтөбе медициналық орталығында операцияның жаңа түрі – микроваскулярлық декомпрессия жасап, үш тармақты жүйке невралгиясы мен гемифациалды түйілуді емдеудің озық тәсілдерін көрсетті.
– Бұл біз үшін нәтижесінде пациент өмірін айтарлықтай жақсартатын әдеттегі операция. Ақтөбелік әріптестеріміз осындай операцияларды өздері атқаруы үшін өз тәжірибемізбен бөлісуге дайынбыз. Мен өткізген консультацияға науқастар көбінесе омыртқа жарығы, қан тамыры аурулары, мидағы ісік, эпилепсия мәселелерімен келді. Осы сапарымыздағы ақпарат алмасу, кері байланыс кезінде бұл өңірде эпилепсия ауруын емдеу едәуір дамығанын байқадым. Ендігі жерде жергілікті дәрігерлермен өзара байланысымызды бұрынғыдан да нығайтып, пациенттерге білікті көмек бере алатынымызға сенімдімін, себебі бізде жақсы тәжірибе бар, – деді дәрігер М.Саршаев.
Алматыдағы Орталық клиникалық ауруханасының онкохирургтері Естай Абзалбек пен Марат Ахетов те әрқайсысы төрт сағатқа созылған күрделі операция жасады. Олар асқазанды қайтадан іш қуысына қалпына келтіретін асқазанды жеңдік кесу мен көкет жарығы операцияларын жасады. Ақтөбелік пациенттің асқазаны көкетті қысып, денсаулығына үлкен қиындық келтірген. Екі операция да қосарлы ауруларымен бірге асқыну тудырған, бір пациентте диабет, семіздік болса, екіншісінде – бұрынғы операциядан қалған тыртықтың салдары мен жіті холецистит кедергі келтірген. Алайда лапароскопиялық операция сәтті өтті.
– Әрине, ақтөбелік әріптестеріміз бізге дейін де осындай операция жасап келген. Бірақ олар біздің шетелдегі шеберлік сабақтарынан сұрыптап апарған жаңа көзқарасты, жаңа әдістерді көрді. Оның үстіне біз машықтанған онкохирургтер болғандықтан, күрделі операцияға байыппен қараймыз, қауіптерден, өзгешеліктерден қорықпаймыз. Осы бірігіп жасаған табысты операцияларымыздан кейін ақтөбелік әріптестерімізге алыс шетелде оқу үшін қаржыландыру қосуға уәде берілді. Бұл да нәтиже. Өйткені қазіргі таңда әлемдік деңгейдегі медицина майталмандарымен қарым-қатынас жасамаса болмайды, оның үстіне медицина да жылдам дамып жатыр, әр жетістікті, озық тәжірибелерді қалт жібермеуіміз қажет, – дейді алматылық мамандар.
Алдағы күндері Алматыдан келген дәрігерлердің басқа күрделі операциялары, шеберлік сабақтары, консультациялары кеңінен талқыланатын болады. Қазірдің өзінде бұл бастаманы жергілікті әлеуметтік желілер белсенді түрде талқылады. Ақтөбе үшін Астана мен Алматы дәрігерлерінің келуі үлкен оқиғаға айналды. Бұдан әрі Қазақстан Республикасы Президенті Іс басқармасы медициналық орталығының күндері Ақтөбе қаласындағы тәжірибені қаперге ала отырып, басқа өңірлерде жалғасын табады. Мұнда ең басты мақсат – халық қай өңірде тұрса да, білікті мамандардың көмегіне қол жеткізе алуы керек. Өйткені «Қазақстан Республикасы Президенті Іс басқармасы медициналық орталығының күндері» аясында науқас жандардың көпшілігі Астана мен Алматыға баруға мүмкіндігі жоқ алыс ауылдарда тұратыны аян болды.
АЛМАТЫ
