Бірінші вице-министр кубалық дипломатты құттықтап, елдеріміздің арасындағы ынтымақтастықты нығайтуға қызығушылық танытқаны үшін ризашылығын білдірді. Ол 2025 жылға дейін «Дені сау ұлт» әрбір азамат үшін сапалы және қолжетімді денсаулық сақтау» ұлттық жобасын іске асыруды қоса алғанда, қазақстандық денсаулық сақтауды дамытудың басым бағыттары туралы айтып берді.
Сонымен қатар Т.Сұлтанғазиев өткен жылдың қараша айында халыққа медициналық көмектің уақтылы көрсетілуін, қолжетімділігін, сапасы мен сабақтастығын қамтамасыз етуге арналған бірыңғай әлеуметтік бағдарланған жүйені қалыптастыру мақсатында Қазақстанның денсаулық сақтау саласын дамытудың 2026 жылға дейінгі тұжырымдамасы бекітілгенін атап өтті.
Өз кезегінде Куба елшісі елінің жеткілікті кадрлық әлеуетін атап өтіп, денсаулық сақтау саласындағы өзара ынтымақтастықты дамытудың маңыздылығына тоқталды.
«Куба Республикасында 497 мың медицина қызметкері немесе арал мемлекетінің еңбекке қабілетті халқының 6,8%-ы бар. Медицина қызметкерлерінің саны бойынша Куба әлемде бірінші орында, мұнда 10 мың тұрғынға 92 дәрігер келеді. Кубалықтардың орташа өмір сүру ұзақтығы 78 жасқа жетті және осы көрсеткіш бойынша Куба Республикасы – әлемде 39-орында», деді Оскар Сантана Леон мырза.
Оның айтуынша, кубалық дәрігерлер дамушы елдерде ғана емес, Италияда, Қатарда және басқаларында әріптестік келісімдердің негізінде ондаған мемлекеттің денсаулық сақтау жүйелерінде жұмыс істейді және көмектеседі.
Кездесу барысында тараптар Қазақстанда кубалық дәрілік препараттарды тіркеу, Кубаның медициналық мекемелерінде қазақстандық азаматтарды емдеу, Кубаның медицина университеттерінде қазақстандық студенттерді оқыту, сондай-ақ қоғамдық денсаулық сақтауға байланысты бірлескен ғылыми іс-шараларға қатысу мәселелерін талқылады.
Кубалық тарап бірқатар бағыт бойынша Қазақстанның Денсаулық сақтау министрлігімен одан әрі жемісті ынтымақтастықты жалғауға дайын екенін білдірді.
