Тағы төрт үміткер мажоритарлық жүйе бойынша сайлауға қатысады. Ал жергілікті мәслихаттарға 160 кандидат тіркелген. Естеріңізге салсақ, «Байтақ» жасылдар партиясы 2022 жылдың соңында экологиялық тұрақты қоғам құру, халықтық демократия және экологияға ұқыпты қарау қағидаттарын қолдау мақсатында құрылған болатын. Саяси аренаға енді қадам басқан жас партияның мақсаты айқын, жігері тасып тұр. Мұны құрылтай барысында аңғардық. Партияның мақсаты – өсімдіктер мен жануарлар дүниесін қорғау, биологиялық әртүрлілікті сақтау, табиғи ресурстарды орынды пайдаланудың жалпы әлемдік қағидаттарын енгізу, инновациялық технологияларды енгізу және қоршаған орта саласын цифрландыру.
Партия төрағасы Азаматхан Әміртаев тізімдегі кандидаттардың шамамен 15-і Мәжіліске баратынына сенімді.
– Біз 2,5 млн дауыс жинаймыз деп ойлаймын, ол шамамен тізімдегі 15 адам, сондай-ақ мажоритарлық тізімдегі кандидаттар бар. Көп нәрсе материалдық ресурсқа байланысты. Біздің партия халықтан шықты, сайлауға қатысу үшін көп қаражат керек. Сондықтан тәуекелдерді азайту үшін екі жақтан да қатысамыз деп шештік. Біздің партияға міндетті түрде лайықты орындар бұйырады деп сенемін. Өйткені жергілікті жерлердегі жақтастарымыз мықты. Халықтың қолдауын да сезініп жүрміз. Партиялық тізімге өткен адамдарды депутаттыққа өткіземіз. «Байтақ» жасыл экономика, жасыл энергетика мәселесімен айналысады.
Біз айналамызға қоршаған ортаны қорғауға бейжай қарамайтын азаматтарды топтастырдық. Түркістан, Жамбыл, Қызылорда, Атырау облыстары, Алматы қаласы мен еліміздің батыс өңірлерінде белсенділер жүйелі жұмыс істеп жатыр,
Біз Парламентте бизнесмендер, байларды емес, қарапайым қоғам белсенділерін көргіміз келеді. Байлар, бизнесмендер тек өз қалталарын ғана ойлайды. Ал біз болашақ депутаттар елдің арасынан шығып, халықты толғандырған мәселелерді көтергенін қалаймыз. Елім деп жүрген қарапайым адамдарды да тарту керек. Сондықтан біз бизнесмендер мен олигархтардың саяси сахнаға келуіне қарсымыз, деді партия жетекшісі.
Саяси құрылым елдегі экологиялық проблемалармен қатар, халықтың табысын арттыру мен әлеуметтік мәселелерді шешуге басымдық беруді көздеп отыр. Құрылтайда байлар мен кедейлер арасындағы алшақтық мәселесі де көтерілді. «Қазақстанда аса бай және кедей азаматтар арасында алшақтық пайда болды. Теңсіздік жөніндегі дүниежүзілік деректер базасынан алынған ақпаратқа сәйкес, 2021 жылы Қазақстандағы ең көп табысы бар ересек азаматтардың 1%-ы барлық кірістердің 15%-ын құраған. Халықтың ең бай пайызы байлықтың 30%-ын, ал кедейлікте өмір сүретіндер тек 5%-ын құрауы байлықты бөлудегі теңсіздікті күшейтіп отыр», деді партия басшылығы.