Аядай ғана ауылдан шыққан баланың болашақта әлемнің алпауыт компанияларының бірінде қызмет етуі бұрын орындалмас армандай көрінетін. Ал қазір бұл қолдан келетін іс, бағындыруға болатын белес болды. Кездесуде отандасымыз балаларға Google-да жұмыс істеу қолжетпес арман емес екенін айтты.
Ернияз Nazarbayev University-інің Computer Science факультетін бітірген. Кейін білімін шыңдаған соң, Яндекс-те тағылымдамадан өтеді. Артынан Google компаниясынан шақырту алып, 2022 жылдың наурыз айынан бастап, Польшадағы Google кеңсесінде бағдарламашы-құрастырушы ретінде жұмысқа тұрады.
– Жұмысқа шақырту алған соң, компанияның кадрмен қамту бөлімімен байланыс орнатасыз, мұндағылар құжаттарды түгендеп, компания жұмысымен таныстырады. Сосын келесі кезеңде қырық бес минут бойы онлайн режімде есеп шығаруың керек. Кейін кеңсеге шақыртыласыз, мұнда күні бойы сонда жұмыс істейтін бес-алты маман сізге бағдарламалауға қатысты әртүрлі сұрақ қояды. Осы кезеңдерден өткеннен кейін арнайы комиссия нәтижені бағалап, әлгі мамандардың берген бағасын саралап, соңғы кезең – келісімшарт жасасуға бағыттайды, – дейді Е.Нұрғабылов.
Талдықорған қаласындағы Зияткерлік мектебінде оқыған жылдары Ернияз математика пәнінен көптеген халықаралық олимпиаданы бағындырды. Тіпті, Қазақстан құрама командасының белді мүшесі де болған. Әлемнің оннан астам елінде білім додасына түсті. Ең жарқын жетістіктердің бірі – халықаралық International Mathimatical Olympiad олимпиадасы. Оған әлемнің түкпір-түкпірінен 150-ден астам мемлекеттің зияткерлері қатысады. Талантты Ернияз бұл олимпиадада екі рет, 10-шы және 11-сыныптарда бақ сынаған. Алғашқы жарысында Аргентинада күміс медаль алса, 11-сыныпта Колумбияда қола жүлдегер атанған.
Бүгінде Google компаниясы Ерниязды барлық жағдаймен қамтамасыз етіп отыр. Ыңғайлы жұмыс кестесін, тамаша кеңсе, тегін тамақ ұсынады және көшуге көмектеседі. Өзі болашақта елге оралып, Отанымыздың әлеуетін арттыруға күш салғысы келеді.
– Мұнда айлық, еңбек демалысы бойынша саудаласуыңа болады. Елде еңбекақы ай сайын беріледі ғой, ал бұл жақта олай емес. Табыс түрлері көп, апта, екі апта сайын берілетіні бар. Сосын қызметкерге компания акция ұсынады. Бұған қоса жыл сайын белгілі бір көлемде бонус береді, – дейді Е.Нұрғабылов.
Мектепті сүйіспеншілікпен еске алған талапты түлек болашақ мамандарға NIS ұсынатын барлық мүмкіндікті пайдалануға кеңес берді.
Жетісу облысы
