Жалағаштықтар да биылғы мерекеде кенттегі Рәміздер алаңын абаттандырып, Темірбек Жүргеновтің 125 жылдығына байланысты қайраткер есімін иеленген елді мекендегі аллеяға 125 көшет отырғызды.
Қызылорда қаласында да «Наурыз нақышы – тазалық» атты көркейту-көгалдандыру шарасы шеңберінде зиялы қауым өкілдерінің қатысуымен көшет отырғызылып, қаланы абаттандыруға бағытталған іс бастау алды.
Шиеліліктер көркейтудің қамына ақпанның соңын ала кірісіп кетіпті. Шиелі кентінің іргесінен өтетін «Шымкент-Самара» күре жолы бойындағы 3,6 гектар аумаққа шаруа қожалықтарының демеушілігімен 3700-ден аса көшет егіліп, 6,4 шақырым аумақ қоршалды. Аудан орталығындағы И.Әбдікәрімов, Ясауи көшелерінің бойындағы 7,1 гектар жерге өндіріс орындары, мекемелер жұмысшылары мен тұрғындар жұмылып 9 450 көшет отырғызды.
Осылайша, биыл ауданда 24 000 түп егілуі жоспарланғанмен, нақты отырғызылғаны 40 мыңның үстіне шығады. Көбіне су тапшылығынан егілген шыбық желекке айналмай жатып қурап қалатыны бар. Осыдан да ауданда жаңа егілген аумақтар үшін арықпен келетін аяқсудан бөлек, арнайы 4 ұңғыма қазылды.
Көптің ісі көркейтуге үлкен үлес қосып жүрген жандар да жетерлік. Көшет отырғызып, көктемнің сәнін кіргізетін сондай сәтті асыға күтетіндердің бірі – Қызылорда қаласының тұрғыны Бектай Сүлейменов ақсақал. Бұл кәсіпті он екі жасынан игерген бағбан осыған дейін орта есеппен 2 млн түп ағаш егіпті.
Түркістан облысындағы Шардара өңірінде дүниеге келіп, Қазақ ауыл шаруашылығы институтын бітіргеннен кейінгі еңбек жолын атақонысы Сырдан бастаған ол облыстың бірқатар ауданында қызмет етті. Тоқсаныншы жылдары Қызылорда қаласының іргесінен жер алып, түрлі ағаш еге бастады.
«Қызылорданың сор топырағына еккен ағаш өнбейді» дейтіндер көп. Бұл – жаңсақ пікір. Қазір бақта жеміс ағашының, басқа талдардың жиырмадан астам түрі бар. Он бір жыл бұрын отырғызған қылқан жапырақтылар қазір 5 метрге дейін өсті. Тіпті анар ағашынан жеміс алып отырмын. Тек тәсілін білу керек», дейді Б.Сүлейменов.
Қазір 4 гектар жерге 2 мыңнан астам ағаш отырғызған бағбан еккенін кәдімгі сорғы қондырғысымен-ақ суарып отыр. Осыдан біраз бұрын шаруасына қолдау іздеп тиісті орындарды жағалаған екен. Мүмкіндігі болса, субсидия алып, бақ аумағын кеңейткісі де келген. Бірақ «сіздің жеріңіз су басу қаупі жоғары аумақта орналасқандықтан, қолдауға жатпайды» деген жауаптан кейін ойындағысының орындала қоймайтынына көзі жетті. Осы жерге алғашқы көшет тіккен 32 жылдан бері ондай қауіпті байқамаған қария бәрінен бұрын осы сөзге қайран қалады.
«Қазір жемістерден алма, алмұрт, сары өрік, тіпті анар да өсіріп отырмын. Бізде көбіне көшетті сырттан тасып, ол жергілікті топырақты жерсінбей, еңбекті еш етіп жатады. Жергілікті жерден қолдау болса, Сыр топырағына бейім жеміс ағаштары мен талдар егілген аумақты ұлғайта түсер едім», дейді қарт бағбан.
Көктем сәні – көшет. Әр аулада қоршаған ортаны көркейтудің қарекеті байқалады.
Қызылорда
