Ресми мәліметтерге сүйенсек, күдікке ілінген қыздардың бірі Оралхан Бөкей атындағы №44 мектеп-лицейінде оқыса, енді бірі қаладағы №5 мектептің оқушысы. Ал оқиға осыдан бір ай бұрын болған екен. «Аталған оқиға 1-2 наурыз күндері болған. Бұл фактіге қатысты Қылмыстық кодекстің 293-бабының 2-бөлігі бойынша Өскемен қалалық Ертіс полиция бөлімшесінде қылмыстық іс тіркеліп, сотқа дейінгі тергеу жүргізіліп жатыр. Тергеуге байланысты өзге де мәліметтер жария етуге жатпайды», деп Шығыс Қазақстан облысы ПД баспасөз қызметі ресми мәлімет берді.
Әлеуметтік желіде тараған бейресми жазбаларда шек жоқ. Кейбір пікірлердің ақ-қарасын анықтау үшін Өскемен қалалық білім бөлімінің басшысы Сәуле Алагөзовамен жолыққанбыз. Оның айтуынша, әлеуметтік желіде жазылғандай, күдікке ілінген бір қыздың анасы білім бөлімінде қызмет еткені рас. Болған оқиғаға байланысты ол жұмыстан шығарылғаны және шындық. Ал әкесінің сыбайлас жемқорлыққа қарсы іс-қимыл саласында қызмет етеді деген пікірдің жалған ақпарат екенін ресми органдар мәлімдеген.
– Тіркелген дерекке қатысты іспен құзырлы органдар айналысып жатыр. Біздің тараптан жүргізіліп жатқан жұмыстарды айта кетсем, ол мектептегі оқушылар мектепішілік қатаң бақылауда. Құқық қорғау органдары шешім шығарғанға дейін оқушылар әлі мектепте, білімдерін алып жатыр. Жалпы, қала бойынша профилактикалық жұмыстар күшейтілді. Ата-аналармен де кездесулер өткіздік, – дейді С.Алагөзова.
Білім бөлімі басшысының айтуынша, жұртты дүрліктірген оқиғаға №44, №5 мектептің және колледж оқушыларының қатыстары бар. Оқушы қыздардың бірі бұған дейін де бұзақылық жасап, тіркеуге алынған екен. Ал басқаларының үстінен осыған дейін арыз-шағым түспеген.
– Бұзақылық жасаған оқушымыздың әкесі мемлекеттік мекемелердің бірінде күзетші, ал анасы бізде кадр бөлімінде қызмет істеген. Қазір ол осы жағдайға байланысты қызметінен босатылды, – деп Өскемен қалалық білім бөлімінің басшысы Сәуле Бауыржанқызы ашық ақпарат берді.
Қазіргі таңда кәмелет жасқа толмаған оқушылармен психолог мамандар жұмыс жүргізіп жатыр. Қылмыстық істің соңы қалай аяқталарын сот шешеді. Әзірше оқушылар білімдерін жалғастырып жатыр. Оралхан Бөкей атындағы №44 мектеп директоры Жаңыл Назарбаеваның сөзінше, бұзақылық жасап, күдікке ілінген қыз бала аталған мектепте 1-сыныптан бастап оқиды екен.
– Ол қызымыз волейболға қатысады. Оқу үлгерімі жақсы. Қалалық, облыстық сайыстардан жүлделі орындар алған. Бұл мінезін бірде-бір рет байқамаған едік. Оқиғаны ести сала, мектепішілік есепке қойдық. Онымен әлеуметтік педагог, психолог, тәрбие ісінің меңгерушілері жұмыс істеп жатыр. Ал оқиға сабақтан тыс уақытта болған. Қазір мұндай бұзақылық орын алмауы үшін профилактикалық жұмыс жүргізіліп жатыр. Дәл қазір оқудан шығарып жібере алмаймыз. 9-сынып бітірген соң қоя береміз. Мүмкін оған дейін сот шешімі шығып, жағдай өзгере жатар. Ең бастысы, сот әділ шешім шығарсын, – дейді №44 мектептің директоры Ж.Назарбаева.
Шығыс Қазақстан облысы
