Суретті түсірген Ерлан ОМАР, «EQ»
Денсаулық сақтау министрі Ажар Ғинияттың айтуынша, қазір ауылдағы денсаулық сақтау саласын жаңғырту жөніндегі ұлттық бағдарлама іске асырылып жатыр. Бағдарлама аясында Атырау облысында 2023-2024 жылдары 18 алғашқы медициналық-санитарлық көмек нысанын салу көзделген. Оның ішінде 11 медициналық, 6 фельдшерлік-акушерлік пункт, 1 дәрігерлік амбулатория бар. Ал аудандық ауруханаларда қосымша бөлімшелер ашылып, медициналық жабдықтармен жарақтандыру жоспарланған.
«Биыл жыл басында Атырау облысының әкімдігі 280-нен аса медицина маманы, оның ішінде 183 дәрігер жетіспейтіні туралы мәлімет берді. Әсіресе, акушер-гинекологтерге сұраныс артып отыр. Сол себептен өңірге кадрларды көбірек тарту үшін 2022-2023 оқу жылына резидентурада мамандар даярлауға 24 орын берілді. Оның ішінде екі акушер-гинеколог маманы даярланады», дейді атыраулықтармен кездескен А.Ғиният.
Оның дерегіне сүйенсек, Атырау облысында қан айналымы жүйесі аурулары, оның ішінде инфаркт, инсульт түрімен сырқаттанушылардың көптігі байқалады. Бұған не әсер етеді?
«Өңірде медициналық-санитарлық алғашқы көмекті ұйымдастыруда кемшілік бар. Мұның салдары үйдегі өлім-жітімге себеп болады. Инсульттан кейін «Д» есебіне алынған адамдардың төмен үлесі 42,4%-ды құрап отыр. Ал онкологиялық диспансерде де кадр тапшылығы бар. Бұл диспансерде цитопатоморфолог, химиотерапевт, медициналық физик, торокалды онколог пен онкоуролог секілді арнайы мамандар жетіспейді», деп мәлімдеді А.Ғиният.
Атырау облысы
