Алқалы жиында Мемлекет басшысы ел тәуелсіздігі мен аумақтық тұтастық бәрінен қымбат екенін тағы да еске салып өтті. «Ел бірлігі осы мызғымас құндылықтармен қатар тұруға тиіс. Сонда ғана болашағымыз баянды болады. Татулық пен келісім тек мемлекеттік саясатта емес, қоғамда, үйде, ұжымда, жалпы, барлық жерде дәріптелуі қажет», деген Президент сөздері жалаң ұран емес, әр азаматтың күнделікті ұстанымы болуы керек.
Қазақстан халқына ортақ ұлттық құндылықты қалыптастыру үшін ортақ тіл қажет. Сондықтан Ассамблея мүшелері мемлекеттік тілдің қолданыс аясын кеңейтуге атсалысып жатыр. Өйткені тілі бірдің – ділі бір. Осы бағытта Ассамблея жастарының ойға алған жобалары бар.
Мәселен, біз дебат түрінде жарыс өткізуді ойластырып қойдық. Жарыс толығымен қазақ тілінде өткізіледі. Қазір «Ассамблея жастары» РҚБ ұйымдастыруымен тұңғыш қазақ тілінің аулалық «Үйде сөйле» жобасы енді. Оның мақсаты – қазақ тілін оқыту мен қолдануға, сондай-ақ, этносаралық қарым-қатынас тілі ретінде дамытуға кең мүмкіндіктер жасау. Осы орайда жастар үйден алыстамай қазақ тілін қызықты форматта қолданады. Енді бұл бастаманың аясын кеңейту қажет. Себебі еліміздің түкпір-түкпірінен, атап айтсақ, Шығыс Қазақстаннан, Қарағанды облысынан, Солтүстік Қазақстаннан толассыз өтініштер түсіп жатыр. Өңірлерден осындай клубтар желісін ашуды жүйелі түрде қолға алуымыз керек. Бұл мемлекеттік тілді кең және шынайы қолдануға ықпал етеді.
Ольга СПИРИНА,
Қазақстан халқы Ассамблеясының мүшесі
