Бұл – еліміздегі түрлі этнос өкілдерінің мемлекеттік тілге, елге деген құрметі. Жапониядан келген жас қыздың қазақ тілінің ерекшелігіне қызығып, аз ғана уақытта тілді еркін меңгеріп алғандығына риза боласыз. Сондай-ақ алыстағы Америкада жүріп, өзінің күш-жігерімен қазақ тілін үйреніп алған дипломаттың ерік-жігері мен ынта-ықыласына құрметіміз шексіз. Алайда сол азаматтың Қазақстанға келіп, Астанада жүріп осы елдің мемлекеттік тілін, яғни қазақ тілін одан әрі дамыта алмай жүргені қынжылтады. Себебі ол кісіге мемлекеттік тілді үйренетін орта жоқ. Мұнда араласатындардың көпшілігі орысша сөйлеуге бейім тұрады. Міне, осы мәселені түбегейлі қолға алып, мемлекеттік тілдің дамуына жол ашатын кез келді. Осы арада тағы бір қолға алатын мәселе, жаңа сайланған Парламентте депутаттар қабылдайтын заңдарды алдымен мемлекеттік тілде дайындауға мән берулері керек. Ол туралы депутаттар мәселе көтере бастады.
Қазақ тілін жаңғыртудың қазіргі негізгі талабы тілдік қажеттілікпен орайлас. Егер тіл реформасын жүзеге асырмайтын болсақ, мемлекеттік тілге деген сұранысты арттыра түспесек, тілді дамытудың тетіктерін жасамасақ, іс ілгері баспайды.
Ассамблея құрамындағы мемлекеттік тілге деген ықыластары басым азаматтарды халық ерекше құрметтеп, әрқашан сыйлайды. Біздің тіліміз – бірліктің, ынтымақтың айнасы. Осы құндылықты әрдайым нығайта берейік.
Саясат БЕЙІСБАЙ,
Философия, саясаттану
және дінтану
институтының бас сарапшысы
