Егіздер 2000 жылы Ақтөбе қаласында дүниеге келген. Облыс орталығындағы автопарктердің бірінде механик болып жұмыс істеген әкелері Сабыржан 2012 жылы дүние салған екен. Аналары Әсел есепші болып жұмыс істейді. Кішкентайынан еңбекқор болып өскен Аман мен Есен 2017 жылы Ақтөбедегі №40 орта мектепті тәмамдайды. Сол жылы екі мәрте Кеңес Одағының Батыры Талғат Бигелдинов атындағы Әуе қорғанысы күштерінің әскери институтына инженер мамандығы бойынша оқуға түсіп, курсант атанды. Бір кездері жарықтық әкелері ұшқыш болсам деген ниетпен осы оқу орнына түспекке бағын сынаған екен. Денсаулығына байланысты ол арманы орындалмапты. Әйтсе де әке арманын орындау ағайынды егіздерге бұйырыпты. Мектепте жақсы оқып, үлгілі тәртібімен үздік оқушы атанған Аман мен Есеннің анасы үшін бұл ақ түйенің қарны жарылған күн болды. Кішкентайынан әже тәрбиесін көріп, үлкенді сыйлап, туған елдің тарихын танып, дәстүрін сақтауға талпынып өскен ұлдары үшін ерекше қуанған анасы ақсарбас айтқан.
Әскери тәртіпке мектептен дағдыланған екеуі институттың күн тәртібіне де жылдам бейімделіп кетті. Курсанттар арасында беделге ие болды. Кез келген жерде достарына көмек беруге дайын тұратын. Берілген тапсырманы бұлжытпай орындайды. Бала күнінен футболға құмар егіздердің спорттық, мәдени іс-шаралардан қалыс қалған кезі жоқ. Қазір де әскери бөлімнің футбол командасында жақсы өнер көрсетіп жүр. 2021 жылы жоғары әскери оқу орнын бітіріп, «лейтенант» атағын алған ағайынды Бисембайлар алғашқы күннен Ақтау гарнизонындағы 30153 әскери бөлімінде қызмет атқарып келеді.
«Біз үшін әскери мамандықты меңгеріп, Қарулы Күштер қатарында қызмет ету – үлкен абырой, – дейді Аман. – Әсіресе анамыз біздің бұл жетістігімізге ерекше қуанды. Ең бастысы, әскери өмір екеуімізге де ұнайды».
«Бір үйдің әлпештеген еркесі болсақ та, өмірдің белесіне бірге өрлеп келеміз, – дейді ағасының сөзін жалғаған Есен. – Қуанышымыз да, қиыншылығымыз да бір. Үйлену тойымызды да бір күнде жасайтын шығармыз. Әкемізден қалған қара шаңырақтың түтінін түтетіп, Ақтөбеде нағашы әжемізбен бірге тұрып жатқан анамызды қолымызға алсақ деген арманымыз бар.
«Үйленіп, шаңырақ көтермек ойларың болса, сөз байласқан қыздарың бар шығар?» деген сауалымызға Аман: «Әрине. Олар да біз секілді егіз. Студенттер. Ақтөбеде оқып жатыр. Әзірге аты-жөндері құпия бола тұрсын», деп жымия жауап берді. Әңгімеміз күнделікті қызмет тақырыбына ауысқанда лейтенант Аман Бисембай: «Біздің мамандық аса жоғары жауапкершілікті талап етеді. Ұшақтан әуеде қандай да бір ақау шықса, оны қалпына келтіру мүмкін емес. Сол себепті әуе кемесі көкке көтерілмей тұрып, жерде жіті тексерілуге тиіс», деді.
Расында, қыр-сыры мол инженер-техниктер қызметінің жауапкершілігі ауқымды-ақ. Мәселен, бір ұшақтың әуеге көтерілуіне он шақты техникалық құрамның мамандары қызмет көрсетеді екен. Сол себепті ұшақтардың әуедегі қауіпсіздігіне бірден-бір жауапты – техник мамандар. Олар күнделікті ұшудың алдында бір күн бұрын ұшақтардың ұшуына дайындық өткізіп, ондағы авиациялық жабдықтар мен қару-жарақ жүйелерін жіті тексереді. Ұшар алдында жалпы тексеріс өткізіліп, сосын бақылау тексеріс жүргізіледі. Содан кейін ғана ұшуға рұқсат беріледі. Сондықтан мамандар аптасына бір рет инженерлік техникалық дайындықтан өтіп тұрады. Антына адал, сертіне берік ағайынды егіздер лейтенант Аман мен Есен Бисембайлар болашақ Отан қорғаушы жастарға үлгі болары анық.
Мұхарбек МАХАМБЕТ,
әскери журналист
