Оқырмандарымызға оңай болу үшін жазылу жолын түсіндіріп өтсек, «Kaspi.kz» қосымшасына кіріп, «Төлемдер» батырмасын басасыз. Оның ең төменгі жағында «Басқасы» деген бөлімге кірсеңіз, «ҚР баспа басылымдары» деген батырманы көресіз. «Жазылым төлемі» деген жерге өтіп, өзіңізге қажет басылымды таңдайсыз. Ол жерде 3 айға немесе 6 айға жазылуға болады.
Кестеде «Egemen Qazaqstan» газетіне осы мерзімдерге жазылу құны қала, аудан, ауылдар үшін қанша болатыны, сондай-ақ жеке және заңды тұлғалар үшін төленетін сомасы берілген. Өзіңіздің мекенжайыңызды жазғаннан кейін кестеде берілген қажетті соманы енгізіп, төлем жасайсыз.
Айта кетейік, әзірге «Kaspi» қосымшасы арқылы отандық 18 басылымға жазылуға мүмкіндік бар. Оның ішінде «Egemen Qazaqstan» газетінен бөлек «Қазақ газеттері» ЖШС-ға қарасты «Казахстанская правда», «Ana tili», «Уйғур авази», «Дружные ребята» газеттері мен «Urker», «Мысль» журналдарына да жазылуға болады.
Post.kz қосымшасы арқылы да баспасөзге жазылу жеңілдей түсті. Қазір аталған қосымша «Басылымдарға жазылу» деген жаңа қызметті басты бетке шығарып қойған. Соған өтіп, қажетті басылымның атауын іздеу жолағына жазсаңыз шығады. Мысалы, «Egemen Qazaqstan» газетіне жазылу үшін өз инде-ксіңізді білу керек. Төмендегі кестеде индекстер бойынша жазылу бағалары берілген. Мәселен, сіз Астана қаласынан болсаңыз, 25392 индексін таңдап, «Басылымға жазылу» батырмасын басасыз. Ол жерден жыл соңына дейінгі айлар тізімі шығады, соның астындағы «Өзгерту» батырмасын басып, қанша айға және қанша газетке жазылу керегін көрсетесіз. «Kaspi» қосымшасынан артықшылығы, бұл жерде жазылу сомасын өзі шығарып береді. Содан кейін толық мекенжайыңыз бен телефон нөміріңізді жазып, кез келген банк картасымен төлем жасай бересіз.
Айта кетсек, «post.kz» қосымшасы арқылы отандық ғана емес, шетел басылымдарына да жазылуға мүмкіндік бар. Қазіргі таңда тұрғындар 1761 басылымға жазыла алады, оның ішінде 460 республикалық, 422 өңірлік және 879 шетелдік газет-журнал бар.
Ал «Қазпошта» сайты арқылы жазылу үшін клиенттер https://post.kz/internet-subscription сілтемесі арқылы тіркелу қажет.
«Post.kz» қосымшасы Google Play/AppStore арқылы Android/IOS операциялық жүйесі бар ұялы телефондарда қолжетімді екенін еске саламыз.
