![Демографиялық өсім құрылысқа дем берсе игі](/media/2023/05/21/aleumet-21-05-1.jpg)
Сонымен қатар бастауыш сынып оқушыларының 22,6%-ы ғана ыстық тамақпен қамтылған. Ал әлеуметтік осал отбасылардан шыққан мектепке дейінгі мекемелердегі балалар ата-аналарының есебінен тамақтанады. Сондай-ақ 328 мектепте техникалық мүмкіндіктердің болмауынан интернет жылдамдығы төмен, 16 мектепте дәретхана тек сыртта орналасқан. Колледждердің зертханалары мен шеберханаларының 40%-ын жаңарту қажет.
Әлеуметтік жағдайы арқылы қай өңірдің болсын бет-бейнесін көруге болады. Аталған мәселелерді облыс әкімдігі біледі, Үкімет хабардар. Парламенттің төменгі палатасында да депутаттар өңірдің білім саласындағы өзекті мәселеге қатысты Премьер-министрдің орынбасары Алтай Көлгіновке сауал жолдады.
Депутаттық сауалда апатты жағдайдағы мектептердің санын азайту үшін 50 жыл, 40 жыл және 30 жыл бұрын пайдалануға беріліп, күрделі жөндеу көрмеген орта білім беру орындарының материалды-техникалық базасын нығайту өзекті екені айтылды. «Елімізде Түркістан облысы – демографиялық өсімі жоғары өңір. 2023 жылдың 1 қаңтарында облыс халқының саны 2 млн 119 мыңнан асты, оның ішінде қалада – 519 мың, ауылдық жерлерде 1 млн 599 мыңнан аса адам тұрады. Өткен жылғы 1 қаңтармен салыстырғанда халық саны биыл 30 мың адамға немесе 1,5%-ға өскен. 2022 жылғы қаңтар-желтоқсанда облыс бойынша 58 117 нәресте дүниеге келген. Бүгінде Түркістан облысында 515 мың 079 оқушы білім алып жатыр. 2022-2023 жылғы оқу жылында 50 мың бала мектеп табалдырығын аттаған. Облыстағы 998 мектептің 907-і – мемлекеттік, олардың 121-і күрделі жөндеуді қажет етеді. Оның ішінде 51 мектептің жобалық-сметалық құжаттары дайын, 70 мектепке жобалық-сметалық құжаттар дайындау қажет. Облыстық білім беру басқармасы мен облыс әкімдігі күрделі жөндеуді қажет ететін 121 мектепке облыстық бюджеттен қаржы бөлуге мүмкіндігі жоқ екенін айтуда», делінген депутаттардың сауалында. Бұл орайда «Amanat» партиясы фракциясы Түркістан облысындағы жобалық-сметалық құжаттары дайын 51 мектепті күрделі жөндеуден өткізуге және 70 мектепті күрделі жөндеуден өткізуге республикалық бюджеттен қаржы қарастыруды ұсынып отыр. Мәжіліс депутаттарының ұсынысы бойынша Үкіметтің қандай шешім қабылдайтыны әзірге белгісіз.
Жалпы, өзекті мәселелерді шешу, халықтың әлеуметтік ахуалын жақсарта түсу бағытында облыста тағы қандай жұмыстар атқарылмақ? Өңірде «Ауылдық денсаулық сақтау саласын жаңғырту» жобасы бойынша алдағы үш жылда 49 медициналық нысан құрылысы, сондай-ақ 4 ауданаралық, 2 көп салалы аурухананы жөндеу және заманауи құралдармен жабдықтау жоспарланған. Оқушы саны көп және апатты жағдайдағы мектептер мәселесін шешу үшін алдағы үш жыл ішінде 96 білім нысанын салу жоспарланған. «Жайлы мектеп» бағдарламасы аясында 63 мектеп, жергілікті бюджеттен 33 мектеп салынады. Сонымен қатар білім беру инфрақұрылымын қолдау қоры есебінен республика бойынша 72 мектеп құрылысы жоспарланса, оның 11-і Түркістан облысында бой көтереді. Жергілікті әкімдіктің мәліметіне қарағанда, биыл 33 мектептің құрылысына 22,6 млрд теңге қаралған. Жыл соңына дейін 20 мектепті пайдалануға беру көзделіп отыр. Ал қалған 13 мектептің құрылысы 2024 жылға жоспарланған. Екі апатты, сондай-ақ 5 үш ауысымды мектептің мәселесін шешу мақсатындағы құрылыс Мемлекет басшысының 2023-2025 жыл аралығында 1000 мектеп салу бағдарламасы шеңберінде жүргізіліп жатыр. Құрылыс жұмыстарын жыл соңына дейін аяқтау жоспарланған. Ал қалған 7 үш ауысымды мектептерге қатысты құрылыс жұмыстары «Жайлы мектеп» Ұлттық жобасын іске асыру шеңберінде 2023-2025 жылдар аралығында шешімін тапса, 3 үш ауысымды мектеп мәселесін жекеменшік мектеп салу арқылы шешу көзделіп отыр.
Аудандардағы бірқатар мектеп күрделі жөндеуді қажет етеді. Мысалы, Сарыағаш ауданындағы пайдалануға 1984 жылы берілген М.Ломоносов атындағы №3 орта мектебінде екі ауысымда 2 076 оқушы білім алып жатыр. Оқу ғимаратында электр жүйесінің тозығы жеткен, ғимараттың ішкі қабырғалары, едендері күрделі жөндеуді қажет етеді. Осыған байланысты жобалық-сметалық құжаты әзірленгенімен құрылысқа қаржы бөлінбеген. Ал ауданның адами әлеуетті дамыту бөлімінің ғимараты 1958 жылы мектеп-интернат ретінде пайдалануға берілген екен. Жиырма жыл бұрын бөлімге тапсырылған. Аталған ғимараттың тозығы жетіп, апатты деп танылған. Бөлімде 80-ге жуық адам жұмыс істейді. Сондықтан білімге жауапты бөлімге талапқа сай ғимарат қажет. Ауданда «Жайлы мектеп» жобасы аясында 10 мектеп салынбақ. Ал Келес ауданында аталған жоба аясында 5 мектеп салынады. Биыл 600 орындық мектептің құрылысы басталып, жалпы 3 мектептің іргетасы қаланбақ. Қалған 2 білім ғимаратының құрылысы 2024 жылы жүргізіледі. Жалпы, облыстағы демографиялық өсімге сай сұранысты қамтамасыз ету және білім сапасын арттыру мақсатындағы мектеп салу мәселесінде «Жайлы мектеп» жобасына үлкен үміт артылып отыр.
«Бұл – ерекше жоба. Бағыт – айқын. Заманауи мектептердің құрылысын барынша тездету үшін жыл соңына дейін жер, инфрақұрылым мәселесі толық шешілуге тиіс. Бұл жоба білім сапасын арттыруға мол мүмкіндік береді. Жайлы мектептерде балаларға барынша қолайлы жағдай жасалады. Өңірде демографиялық өсім жоғары. Сондықтан сапалы білім беретін оқу орындарының санын арттыру аса маңызды», деді облыс әкімі Дархан Сатыбалды.
Өңірде бұл жобаны іске асыру үшін 2023-2025 жылдарға арналған республикалық бюджеттен 400 млрд теңгеден аса қаражат бөлінбек. Жалпы, өңірде 10 жыл ішінде салынған 292 мектептің 134-і Түркістан облысы құрылғалы бой көтерген. Жаңа модель енгізілуіне байланысты білім беру саласын басқару, бюджетті бөлу функциялары аудандық деңгейден облыстық деңгейге берілген еді. Осыған байланысты 2021 жылдан бастап мектептердің құрылысына облыстық құрылыс басқармасы тапсырыс беруші болып бекітілді. Облыстық құрылыс басқармасының мәліметінше, өтпелі кезеңде салынып жатқан мектептерді аудан және қала әкімдіктерінен қабылдау барысының бірқатар себеппен созылуы құрылысты уақтылы қаржыландыруға кедергісін тигізген. Бұған қоса пандемия салдарынан және құрылыс материалдарының бағасы өсуіне байланысты құрылыс компанияларының жобалық-сметалық құжаттамаға қолданыстағы заңнамаға сәйкес қайта түзетуден өткізу туралы өтініштер түсіп, құрылыс жұмыстарының бәсеңдеуіне әкеліп соқты. Дегенмен қиындықтарға қарамастан, құрылыс жұмыстарын тоқтатпау арқылы бекітілген меже 2021-2022 жылдары орындалған.
Бүгінде облыс әкімі Дархан Сатыбалдының тапсырмасымен құрылысы тоқтап тұрған білім ұяларының мәселелері қатаң бақылауға алынған. Жосықсыз мердігерлер тізімі жасақталды. Биылға өтпелі 33 мектептің 17-сі бойынша мердігер компаниялар тарапынан 2017, 2018, 2019 жылы әзірленген жобалық-сметалық құжаттамаға қолданыстағы заңнамаға сәйкес қайта түзетуден өткізу туралы өтініштері келіп түскен. Жобалық-сметалық құжаттамалардағы бағаны 2023 жылғы бағамен салыстырғанда 2017 жылғы жобалар 130 пайызға, 2018 жылғы жобалар – 80 пайызға, 2019 жылғы жобалар 50 пайызға өскені анықталып отыр. Бүгінде проблемалық 17 мектептің үшеуі, бұған қоса Ордабасы ауданындағы 600 орындық және 300 орындық, Мақтаарал ауданындағы 200 орындық 2 мектеп бойынша келісімшарт талаптары сақталмауына байланысты мердігер мекемелерімен келісімшарт бұзылып, мемлекеттік сатып алуға жосықсыз қатысушы деп тану туралы сотқа берілген. Қалған 10 мектеп бойынша құрылыс жұмыстары бәсеңдеген немесе келісімшарт талаптары сақталмаған жағдайда заң аясында тиісті іс-шара қолданылады.
Түркістан облысы