Ақсақал жуырда «Egemen Qazaqstan» газетінің аймақтағы тілшілер қосынына арнайы іздеп келіпті. Қолында Президент Қасым-Жомарт Тоқаевқа жазған хатының көшірмесі бар. Өркен ақсақал алдымен Мемлекет басшысы Қасым-Жомарт Тоқаевтың күні кеше елдің әлеуметтік-экономикалық мәселелері жөніндегі кеңейтілген кеңесте айтқан сөзін есімізге салды. «Президенттің атына жазылған арыз-шағымның саны үш жылда 2 есе өсіпті. Мұны Қасым-Жомарт Кемелұлы айтты, тыңдаған боларсыңдар. Жаңа жылдан бері Президент Әкімшілігінің қоғамдық қабылдауында болған 811 адамның 730-ын кестеден тыс, яғни табан астында жедел түрде Президенттің өзі қабылдауына тура келген. Қоғамдық қабылдауға келгендердің арасында барлық аймақтың тұрғындары бар екен. Мен мына хатта жазылған мәселелерді қала әкіміне кіріп айтқанмын. Нәтиже жоқ. Бұл мәселелерді шешуге жергілікті әкімдердің шамасы келмейді-ау, сірә? Бірақ қолымнан келмейді, шамам жетпейді деп неге ашық айтпасқа? Нақты нәтиже, тұшымды жауап болмаған соң Президентке хат жолдадым», деп Өркен Әбдірайымұлы хатын бізге ұсынды. Қарияның рұқсатымен наурыздың ортасында жазған хатын біз де оқыған едік.
«Мен, Әбдіреев Өркен Әбдірайымұлы 88 жастамын. Тыл және еңбек ардагерімін, мекемелерді басқардым. Жетістіктерім үшін Еңбек Қызыл Ту орденімен, 12 медальмен марапатталғанмын. Отбасымда 4 ұл, 3 қыз, 15 немере мен 2 шөберенің атасымын. Қазіргі таңда жасым 90-ға жуықтаса да 105 пәтерлі көпқабатты тұрғын үйдің үй басқарушысымын», деп бастапты Президентке жолдаған хатын Өркен қария. Әрі қарай көкейінде жүрген бірнеше мәселені көтерген қария Президенттен бақылауға алып, шешілуіне ықпал етуін сұрайды. «Шырайлы Шымқаламызда Асанбай Асқаров ағамыз салдырған «Фосфоршылар» мәдениет сарайы қазір қараусыз қалып, қирап, іші қоқысқа толып, маскүнемдер мен бұзақылардың «ордасына» айналды. Айналасындағы саябақ аумағы жарықсыз, қараусыз қоқысқа толы... Осы мәдениет сарайын қала өзінің балансына алып, қалпына келтіріп, көріктендіріп, демалыс аймағын салып, атауын «Өзбекәлі Жәнібеков атындағы жастар сарайы» деп қайтадан ашса деген арманым бар».
Сондай-ақ қария Президентке жолдаған хатында еліміздің саяси, экономикалық, мәдени дамуына басшылық жасаған жылдары қазақ мемлекетінің аумақ тұтастығының сақталуына көп еңбек сіңірген Жұмабек Тәшеновтің аты Шымкентте шағын көшеге беріліп, кішігірім ескерткіш қойылғанын, фамилиясы көп жерлерде дұрыс жазылмағанын айтады. «Шымкенттегі теміржол вокзалының алдындағы жүрмейтін сағатты алып тастап, орнына Ж.Ташеновтің үлкен ескерткішін қою керек, ол қалаға қосымша көрік берер еді», дейді Өркен қария хатында. Ақсақалдың мемлекет қайраткері, этнограф Өзбекәлі Жәнібековке қойылған ескерткішке де көңілі толмайды. «Өзбекәлі Жәнібековтің 90 жылдығына орай Шымкенттегі орталық саябаққа ескерткіш қойылған. Есімі жердегі жұқа тұғырға жазылған, оны ешкім көрмейді. Ескерткіштің қойылған жеріне көңіл толмайды, халық көп жүретін жерге қойылса деген ұсыныс бар», дейді Өркен Әбдіреев. Мемлекеттік тілге жанашырлық танытып жүрген қария Төле, Қазыбек, Әйтеке билердің есімдері көшелердің бойында әртүрлі жазылып жүргенін де айтады.
Жергілікті әкімдіктің кей мәселені шешуде қауқарсыздық танытатынына қынжылысын білдірген қария Президенттен жауап келетініне сенімді екенін айтты. «Кешегі сөзінде Мемлекет басшысы «Халық үніне құлақ асатын мемлекет» болу үшін азаматтармен тығыз қарым-қатынас орнату айрықша маңызды екенін айтты. Әкімдердің жауапкершілікті өзіне алып, дер кезінде шешім қабылдаудан қашатынын да сынға алды. Президенттің сөзінен кейін қорытынды шығарған әкімдер жергілікті мәселелер бойынша дер кезінде шешім қабылдап немесе нақты жауап беріп, жұртты жоғарыға жүгінуге жеткізбейтін шығар деп үміттенемін», дейді Өркен Әбдірайымұлы.
ШЫМКЕНТ
