Аймақтар • 03 Шілде, 2023

Роман Скляр Павлодар облысына жұмыс сапарымен барды

158 рет
көрсетілді
3 мин
оқу үшін

1 шілдеде Премьер-министрдің бірінші орынбасары Роман Скляр Павлодар облысына жұмыс сапарымен барып, Павлодар және Екібастұз қалаларында жүргізіліп жатқан жөндеу жұмыстарының және алдағы жылу беру маусымына дайындық барысымен танысты, деп хабарлайды Egemen.kz Үкіметтің баспасөз қызметіне сілтеме жасап.

Роман Скляр Павлодар облысына жұмыс сапарымен барды

Жұмыс сапары барысында Премьер-министрдің бірінші орынбасары Екібастұз ЖЭО-сына барып, тәулік бойы жөндеу-қалпына келтіру жұмыстары жүргізіліп жатқан учаскелерді аралады. 

Станциядағы 10 қазандықтың барлығын жөндеу көзделген, оның ішінде 8 қазандықта күрделі жөндеу жүргізіледі. Бюджет қаражаты есебінен 5 су жылыту қазандығына күрделі жөндеу жұмыстары жүргізіліп жатыр. «ОАЭК» АҚ қаражаты есебінен 5 энергетикалық қазандықты, сондай-ақ қосалқы жабдықтарды, ғимараттар мен құрылыстарды күрделі және ағымдағы жөндеу жүзеге асырылады.

1 шілдеде №7, № 9 қазандықтарын жөндеу аяқталды. Жөндеу жұмыстары 18 тамызда аяқталатын №6 энергетикалық қазандықта және 5 су жылыту қазандығында жалғасып жатыр. № 11, 14, 15 су жылыту қазандықтарында ескі жабдықтарды бұзу жұмыстары аяқталып, құрылыс-монтаждау жұмыстары жүргізіліп жатыр. Экрандық панельдерді, газ құбырларын, конвективті пакеттерді және құбырлы ауа жылытқыштардың текшелерін монтаждау жұмыстары жүргізілуде. Барлық учаскеде жөндеу жұмыстары бекітілген кестеге сәйкес жүріп жатыр.

 «Жылу беру маусымының басына дейін барлық жұмыс аяқталуға тиіс. Тиісті қаражат бөлінді, жұмыстар жүргізілуде», деді Премьер-министрдің бірінші орынбасары. 

Сондай-ақ Роман Скляр 4 жылу магистралін реконструкциялау жұмыстары жүргізіліп жатқан учаскелерде болды. Мұнда 5,4 км желі толығымен жаңартылады.

Павлодар облысының әкімі Асайын Байхановтың айтуынша, бүгінгі таңда аталған учаскелерде 1,9 шақырым жаңа желі салынды. Жұмыстар белгіленген кестеден алда келе жатыр, жоспарланған жұмыстардың барлық көлемін осы жылдың тамыз айының соңына дейін аяқтау жоспарланып отыр.

Екібастұзда әлеуметтік нысандар мен тұрғын үйлерді жылу беру кезеңіне дайындау белсенді жүргізілуде. Қазіргі уақытта гидравликалық сынақтар барысында анықталған барлық 269 ақау толық көлемде жойылды. 690 көпқабатты үйдің 568-інде сығымдау, жүйелерді жуу аяқталды. Басқару нысаны жоқ 182 көпқабатты үйде дайындықты қала құраушы кәсіпорындар жүргізіп жатыр. Шілде айының соңына дейін барлық жұмыс аяқталады. 

Сонымен қатар Премьер-министрдің бірінші орынбасары Роман Скляр Павлодар қаласындағы жылу беру маусымына дайындық жұмыстарының барысын тексерді. Мұнда негізгі жабдықтың 40 бірлігін жөндеу және 49,1 шақырым жылу желілерін қайта жаңарту жүргізілуде. Облыс орталығындағы жылу желілерінің тозуын азайту мақсатында 2023 жылы алғаш рет кварталішілік желілерді реконструкциялау жүргізіліп жатыр. Барлығы 11,7 км жаңа желілер салынады. 

Бірінші вице-премьер жылу желілерін жөндеу жұмыстарының мерзімінде орындалуы және өңірдегі жылу беру маусымына дайындық Үкіметтің басты назарында екенін және облыс басшылығының ерекше бақылауында болуға тиіс екенін атап өтті. Павлодардағы Ертіс өңірінің тұрғындары үшін алдағы жылу беру маусымдарының сәтті өтуі жергілікті билік пен мердігерлік ұйымдардың үйлесімді жұмысына тікелей байланысты.