2005 жылғы Азия чемпионы және 2006 жылғы Азия ойындарының күміс жүлдегері, бүгінде жаттықтырушы болып еңбек етіп жүрген Рашид Юнусметовтің шәкірті Никита Чирюкин Кореядағы бәсекеде кіші калибрлі тапаншамен 25 метрден оқ ату бағдарламасында өнер көрсетіп, қарсылас шақ келтірген жоқ. Отандасымыздан кейінгі жарыстың жүлделі орындарын қытайлық Чжан Чжихао (күміс) мен жарыс қожайыны Сук Джин Хонг (қола) иеленді. Бұл – Чханвон қаласында өтіп жатқан чемпионаттағы Қазақстан құрамасының алғашқы жүлдесі. Осы көрсеткішпен жерлестеріміз жалпыкомандалық есепте 9-орынға көтерілді.
Оңтүстік Кореядағы әлем біріншілігіне жер-жаһанның 45 мемлекетінен келген 600 спортшы түрлі түсті жүлделерді сарапқа салып жатыр. Әлем чемпионаты 25 шілдеде аяқталады.
