«Samruk-Kazyna Trust» әлеуметтік жобаларды қолдау қоры, «Qazaqgaz» өндіру және барлау ЖШС демеушілігімен ауылдағы орталық саябақ қайта жаңғыртылып, баскетбол, волейбол және street workout алаңшасы салынып, халық игілігіне берілді.
«Соңғы деректерге сүйенсек, Талас ауданы халқының 40,9 пайызы тұрақты түрде бұқаралық спортпен шұғылдана бастады. Бұл, әрине, көңіл қуантарлық нәтиже екені даусыз. Ауыл балаларының спортпен айналысуы үшін жергілікті атқарушы билік қолұшын созып отыр. Облыс әкімі Нұржан Нұржігітов те бұл мәселені назардан тыс қалдырған емес. Ойық ауылының тұрғындары спорт алаңы керектігін бұрыннан айтып жүрген. Бүгін, міне, демеушілік есебінен олардың тілегі орындалып отыр», дейді Талас ауданының әкімі Нұрбол Жүнісбеков.
Жаңадан салынған спорт алаңында балалардың баскетбол, волейбол секілді спорт түрлерімен емін-еркін айналысуына барлық мүмкіндік қарастырылған. Аудан әкімінің айтуынша, алаңды салу барысында жергілікті атқарушы билік ауыл жастарын ғана емес, жалпы тұрғындардың жағдайын жасауға айрықша ден қойған. Нәтижесінде жайлы орындықтар орналастырылып, елді мекен тұрғындарының алаңсыз серуендеуі үшін жайлы аймақ қарастырылыпты.
