Емханада 800 келушіге арналған диагностикалық орталық орналасады. Ал 96 төсектік орынға лайықталған көпбейінді реабилитациялық орталықта физиотерапия, онкология, кардиология, инсульт орталығы, жарақат бөлімшелері ашылады. Жаңа 200 жұмыс орны ашылады, оның 50-і – бейінді дәрігерлер. Медициналық орталық екі жылдың ішінде салынады. Клиника заманауи үлгідегі медициналық жабдықтармен толық қамтамасыз етіледі. Сондай-ақ Мемлекет басшысының тапсырмасымен Сарыағашта республикалық бюджет есебінен перинаталды орталығы бар көпсалалы медициналық кешен салынып жатыр. 10 гектар жерде бой көтеретін кешенде перзентхана, көпсалалы аурухана, емхана және әкімшілік ғимарат орналасады. Ал Түркістан қаласында салынып жатқан 570 төсектік орынды көпбейінді аурухана құрылысы жыл соңына дейін аяқталып, ел игілігіне пайдалануға берілмек.
Сонымен қатар облыс орталығында облыстық балалар ауруханасының және «Ана мен бала» орталығының да ғимараттарын салу жоспарланып отыр. Өткен жылдың өзінде облыста «Дені сау ұлт – әрбір азамат үшін сапалы және қолжетімді денсаулық сақтау» ұлттық жобасы аясында ауылдық елді мекендерде медициналық пунктер мен дәрігерлік амбулаториялармен қамту мақсатында 29 ауылда 31 денсаулық сақтау нысанының құрылысы жүргізілді. Оның 17-сінің құрылысы жоспарға сәйкес аяқталып, ел игілігіне пайдалануға берілді. Шардара ауданында тәулігіне 150 адам қабылдауға қауқарлы, құрамында жедел жәрдем стансасы бар, құрылысы аяқталған қалалық емхана қолданысқа берілді. «Ауыл – Ел бесігі» бағдарламасы аясында былтыр Түлкібас ауданы Састөбе кентіндегі 75 келушіге арналған дәрігерлік амбулатория құрылысы толық аяқталып пайдалануға тапсырылды. Тағы 4 дәрігерлік амбулаторияның құрылысы жүргізіледі. Былтыр 5 нысан күрделі жөндеуден өтсе, биыл тағы 2 нысанға жөндеу жүргізіледі. Облыста 2024 жылға қарай – Жетісай, Сарыағаш, Сайрам және Ордабасы аудандарында төрт жаңа көпбейінді ауданаралық аурухана құрылады. Бұлар көрші аудандардың тұрғындарына да қызмет етеді. Жыл соңына дейін құрылысы аяқталып, пайдалануға берілетін Түркістан облыстық көпбейінді ауруханасы Созақ, Отырар және Сауран аудандарының тұрғындары үшін осы функцияларды орындайды. Ауданаралық ауруханаларды іске қосу Шымкент пен Түркістандағы медициналық мекемелердің жүктемелерін біршама азайтуға мүмкіндік береді. Яғни денсаулық саласына қолдау көрсетудің нәтижесінде медициналық мекемелер қатары арта түскен. Әрине, бұл бағыттағы мемлекеттік саясатты халық қолдап, жасалған қолайлы жағдайларға ризашылығын білдіріп жатыр. Алайда осы салынып жатқан, пайдалануға берілген мекемелерде, алынып жатқан заманауи құрал-жабдықтарды меңгерген сапалы қызмет атқаратын маман тапшы.
Түркістан облысында, әсіресе бейінді мамандар арасында 258 маман, анестезиолог-реаниматолог, офтальмолог, лор, кардиохирург, травматолог, кардиолог, невропатолог, нефролог, онколог, патологоанатом, радиолог, неонатолог, жедел жәрдем дәрігері секілді кадрлар жетіспейді. Оның бірден-бір себебін облыстық денсаулық сақтау басқармасы резидентурада оқыту мерзімінің ұзақтығымен байланыстырады. Бұл орайда, яғни тапшылықты жою мақсатында биыл жергілікті бюджет есебінен бірінші рет 60 грант бөлінген.
Түркістан облысы