ФОТО: gov.kz
Көрме екі ел басшылары қол жеткізген келісімдерді, сондай-ақ осы жылдың мамыр айында өткен «Қытай – Орталық Азия» саммитінің нәтижелерін іске асырудағы маңызды қадам болып отыр. Аталған саммитте ел Президенті Қасым-Жомарт Тоқаев пен Қытай Халық Республикасының төрағасы Си Цзиньпин екі ел арасындағы білім беру және ғылыми зерттеулер саласындағы көпсалалы ынтымақтастықты тереңдету туралы маңызды келісімдерге қол қойған болатын.
Көрме аясында екі ел университеттері арасындағы ынтымақтастық туралы екіжақты меморандумдар жасалып, бірқатар жоба мен бағдарлама іске қосылды. Шэньси провинциясы партия комитетінің хатшысы Чжао Идэ «Біз Шэньси провинциясы мен Қазақстан арасындағы білім беру ынтымақтастығы саласындағы тамаша нәтижелермен мақтана аламыз», деді. Расында да, қазіргі уақытта Қазақстан мен Қытай университеттері арасында 249 келісімге қол қойылып, 20 халықаралық бірлескен жоба іске асырылып жатыр.
Қытай Халық Республикасының төрағасы Си Цзиньпиннің біздің елден мемлекеттік сапары барысында қытай тарапы Қазақстанда Лу Бань шеберханасын ашуды ұсынған болатын. Қазіргі уақытта Тяньзинь кәсіптік институтының қолдауымен Д.Серікбаев атындағы Шығыс Қазақстан техникалық университетінің базасында Лу Бань шеберханасын ашу жоспарланып отыр. Сол секілді М.Әуезов атындағы Оңтүстік Қазақстан университеті ресми түрде Қытайдың жетекші 10 жоғары оқу орнының құрамына кіретін Шыңжаң Цзяотоң университетінің бастамасымен Жібек жолы университеті Альянсының (UASR) бақылаушысы болды. Альянстың мақсаты – Жібек жолы елдерінде білім және ғылым саласындағы ынтымақтастықты дамыту.
Қытаймен ынтымақтастық «Болашақ» халықаралық бағдарламасы аясында да кеңейіп жатыр. Ғылым және жоғары білім министрлігі Жоғары және жоғары оқу орнынан кейінгі білім комитетінің төрағасы Гүлзат Көбенованың айтуынша, 2021 жылдан бастап Қазақстанда «500 ғалым» бағдарламасы сәтті жүзеге асырылып келеді. «Аталған бағдарламаны іске асыру үшін биыл біз ғылыми тағылымдамалар үшін ұсынылатын ұйымдардың тізіміне 50 жетекші жоғары оқу орындары мен ғылыми институттарды енгіздік. Осыған байланысты Қытайдың ғылыми институттарын, ғылыми орталықтарын, ірі ұйымдары мен жетекші университеттерін қазақстандық ғалымдар үшін ғылыми тағылымдамаларды ұйымдастыруға белсенді қатысуға шақырамыз», деді ол.
Бүгінде Қазақстан мен Қытай білім мен ғылымның дамуына ықпал ететін білім беру ынтымақтастығын кеңейтуді әрі тереңдетуді жалғастыру үстінде. Бұл бастамалар мен бағдарламалар екі халық арасындағы ұзақмерзімді қарым-қатынас пен өзара түсіністіктің маңыздылығын растайды және бірлескен даму мен өркендеуге деген ұмтылысын көрсетеді.
