Пікір • 11 Қыркүйек, 2023

Әділдік жолындағы ауқымды жұмыс

219 рет
көрсетілді
3 мин
оқу үшін

Қазақстан Президенті Қасым-Жомарт Тоқаев Парламентте «Әділетті Қазақстанның экономикалық бағдары» атты халыққа Жолдауын жариялады. Мемлекет басшысы елде жүзеге асырылып жатқан саяси реформаларға тоқталды.

Әділдік жолындағы ауқымды жұмыс

Оның айтуынша, «Күшті Президент – ықпалды Парламент – есеп беретін Үкімет» формуласы нығайып, адам құқығын қорғау саласында маңызды қа­дам­­дар жасалып, заң үстемдігі мен әділдікті қамтамасыз ету ба­ғытында ауқымды жұмыс ат­қарылып жатқанын атап өтті.

Жолдауда саяси және әлеу­мет­тік-экономикалық қайта құ­руға қатысты көптеген мәселе қам­тылды. Осы орайда мазмұны ерек­ше келесі тармақтарды атап өткім келеді.

Ақорда мен Үкіметтің құзы­реті. Президент Тоқаевтың пайым­дауынша, Үкімет бюро­кра­тияға және сөзбұйдаға салынбай, Президент Әкімшілігіне жалтақтамай, экономиканы дер­бес басқарудың барлық әдіс-тәсілін қолында ұстауға тиіс. Тоқаев Президент Әкім­ші­лігі басты «саяси штаб» ретінде мемлекетті әлеуметтік-экономикалық дамы­тудың стра­тегиялық бағыт­та­рына, ішкі және сыртқы саясат, қорғаныс және қауіпсіздік, құқық және кадр саясаты мәселе­ле­ріне бар­лық күш-жігерін жұ­мыл­ды­ра­тынын атап өтті.

Әкімдерді сайлау. Аудандар мен облыстық маңызы бар қа­лалар әкімдерін тікелей сайлау өтеді. Жоспар бойынша олардың 45-і қанатқақты ре­жімде таңдалады. Президент аудан әкім­деріне бюджетті дербес қа­лып­тастыру құқығын беру туралы нұсқау береді.

Атом энергетикасының дамуы. Қазақстан Президенті елде атом электр стансасын салудың қажет екеніне күмән келтірген жоқ. «Атом электр стансасын салу немесе салмау мәселесі – еліміздің болашағына қатысты аса маңызды мәселе. Сондықтан оны жалпыұлттық референдум арқылы шешкен жөн деп санаймын. Нақты мерзімін кейін анықтаймыз», деді Қ.Тоқаев.

Қорғаныс-өнеркәсіп кешенін нығайту. Бұл сала дамыған елдердің ұлттық қауіпсіздігін қамтамасыз ету ісінде басты рөл атқарады. «Осы орайда им­порт­қа тәуелділікті азайтуға мүм­­кіндік беретін, жергілікті өнім үлесі жоғары өндіріс ке­ше­нін құру – аса маңызды міндет. Біздің армиямыз жоғары технологиялы қару-жарақпен және әскери техникамен, соның ішін­де бронды техникамен, ұш­қышсыз басқарылатын ұшу ап­па­рат­тарымен, қазіргі за­манғы атыс қаруларымен жаб­дық­­талуға тиіс», деп тапсырма берді Қазақстан Президенті.

Жаңа министрліктер құру. Мемлекет басшысы Су ресурс­тары және ирригация ми­нис­тр­лігін құруды ұсынды. «Еліміз үшін судың маңызы мұнай, газ немесе металдан кем емес. Су шаруа­шылығы жүйесін тиімді дамыту мәселесімен дербес ме­кеме айналысуы қажет деп санаймын», деді Қ.Тоқаев. Тағы бір жаңа ведомство ретінде Көлік министрлігі құрылмақ. Қазақстан Президентінің па­йымдауынша, көлік-логистика саласы экономиканы алға бас­тайтын басты күштің біріне айналуға тиіс. «Қазақстан сол­түс­тік пен оңтүстікті, батыс пен шығысты байланыстыратын жаһандық жолайрықта орна­лас­­қан. Бұл біздің елімізге зор мүмкіндік беріп отыр», дейді Мемлекет басшысы.

Президент Тоқаевтың Жол­дауы Қазақстандағы атқару­шы билік жүйесін қайта құруды көздейді. Өйткені рефор­ма­лар­дың негізгі міндеті атқарушы билік жүйесіне жүктеледі. Үкі­мет­тің кадрлық трансформациясы Мемлекет басшысының Жол­дауынан кейін бірден бас­талды. Ел үкіметінде де, Пре­зидент Әкімшілігінде де кадр­лық өзгерістер болды.

 

Александр ЦИНКЕР,

Шығыс Еуропа және ТМД елдері институтының директоры