Осы теңгермелі тежемелі, прагматикалық саясатты жүргізе отырып, ұлттық мүддемізді халықаралық аренада сауатты жүргізе білу маңызды. Әрине, бұл ретте әлемнің барша елімен қатар АҚШ-тың да өзіндік орны бөлек. Дөңгелек үстел басына жиылып, мәселелерді ашық айту, талқылау және оны дипломатиялық жолмен шешуге ұмтылу барлығына тиімді. Себебі жаһандану заманында барша елдің экономикасы өзара бір-бірімен тығыз байланысты. Тіпті көлік логистикасынан бастап өзге секторларды сөз етсек те, мемлекеттер бір-бірімен дипломатиялық арналар арқылы тиімді саясат жүргізуге мүдделі.
Президент Қасым-Жомарт Тоқаев Жолдауында «Көлік-логистика саласын қарқынды дамыту – стратегиялық міндет. Үш жыл ішінде оның ішкі жалпы өнімдегі үлесі кемінде 9 пайызға жетуге тиіс. Ол үшін саланы тиімді басқару өте маңызды» деген еді. Осыған орай Мемлекет басшысының АҚШ-қа іссапары аясында ҚТЖ мен «Wabtec» компаниялары арасында стратегиялық ынтымақтастық туралы негіздемелік келісімге қол қойылды. Осылайша, көлік-логистика саласына шамамен 1 миллиард доллар инвестиция тартылды. Бұл – Транскаспий халықаралық көлік бағдарын дамытуға ықпал етеді және басқа да инфрақұрылымдық жобалар үшін негіз болады. Осы секілді өзге де салаларымыз бар. Мәселен, ауыл шаруашылығы, жасанды интеллект, ІТ технология, тағы басқалары.
Біздің алға қойған мақсатымыз үлкен. Мысалы, Мемлекет басшысы Жолдауда 2026 жылға қарай IT-қызметтерінің экспортын 1 млрд долларға дейін жеткізуді тапсырған. Әрине, бұл салада үздік мемлекеттердің бірі – АҚШ. Олардың технологияға бағытталған университеттері, бұл саладағы өндірістік базасы, ғалымдары әлемдегі ең үздіктердің бірі деп айтсақ болады. Енді алдағы уақытта аталған бағытта біздің жоғары оқу орындарымыз, компанияларымыз серіктестік орнатады деген сенім бар. Осындай мәселелерді талдай келе, еліміз көпвекторлы, теңгермелі, тежемелі, прагматикалық, ғылыми негізделген сыртқы саясатын жүргізе отырып, мемлекетіміздің мүддесін сауатты қорғап келе жатыр деуге толық негіз бар.
Бауыржан СЕРІКБАЕВ,
Қазақстан қоғамдық даму институтының сарапшысы
