Іс-шара аясында Әзербайжан Республикасынан келген делегация облыс әкімі Дархан Сатыбалдымен кездесіп, мәдени, экономикалық және рухани байланыстарды нығайту барысын әңгіме етті. «Бүгінде қайта түлеп, түрленіп келе жатқан Түркістан облысының халқы 2 миллионнан асады. Өңірдің әлеуеті жоғары, инвесторларға толық қолдау көрсетіп келеді. Әзербайжан компанияларын да инвестиция салуға, бірлесе жұмыс істеуге шақырамын», деді Дархан Сатыбалды. Ал Түркі мәдениеті мен мұрасы халықаралық қорының президенті Гюнай Эфендиева Түркістанның ұнағанын, адамдары да ауа райы секілді жылы екенін айтты. Туризм, мәдениет салалары бойынша бірлесе жұмыс істеуге дайын екендерін, бұл кездесу – сол игі істердің бастамасы екенін мәлімдеді. Әзербайжан Республикасы Президентінің Шуша қаласындағы арнайы өкілі Айдын Керимов және Әзербайжан Республикасының Қазақстан Республикасындағы Төтенше және Өкілетті елшісі Агалар Атамогланов Түркістан мен Шуша қалаларының тарихи рөлі, Түркі елдерінің бірлігі жөнінде ой қозғады. Құшақ жая қарсы алған Түркістан жұртшылығына алғыстарын білдірді.
Шуша қаласы күндерінің ресми ашылуында облыс әкімінің орынбасары Бейсен Тәжібаев тарихта орны бар қаһарман қалалардың бір-бірімен байланыс орнатуы заңдылық екенін атап өтті. Түркістан мен Шуша арасындағы экономикалық, рухани, мәдени және туристік байланыстар нығая түсетініне сенім білдірді. Іс-шара барысында «Хуршидбану Натаван» атты деректі фильм көрсетілді. Әзербайжанның мугам-триосының өнері, Түркі мәдениеті мен мұрасы халықаралық қорының бастауымен құрылған «7 сұлу» музыкалық ансамблінің концерті көрермен назарына ұсынылды. Сондай-ақ көпшілік Шуша суретшілерінің көрмесін, дизайнер және модельер Гульнар Халилованың «Карабахтың ұлттық киімдері» дефилесін тамашалады. Түркі мәдениеті мен мұрасы халықаралық қоры мен Қ.А.Ясауи атындағы халықаралық қазақ-түрік университеті арасында меморандумға қол қойылды. Кеш соңында қор президенті естелік сый табыстап, құрмет көрсетті. Қонақтар Түркістанның көрікті орындарын аралады.
Түркістан облысында 23 мыңнан аса әзербайжан этносының өкілі тұрады. Облыстық «Гарабах» этномәдени бірлестігі жұмыс істейді. Әзербайжан этносының тілі, мәдениеті мен дәстүрі күніне арналған іс-шаралар өткізіліп тұрады. Өңірдің қолөнершілер ассоциациясы мамыр айында Шуша қаласында өткен көрмеге қатысып, қазақтың салт-дәстүрлері мен қолөнер бұйымдарын таныстырған болатын. Ал Шәмші Қалдаяқов атындағы облыстық филармониясының әртістері өнер көрсетті.
Айта кетелік, «Түркі әлемінің мәдени астанасы» жобасының негізі 2010 жылы түркітілдес мемлекеттер басшыларының Ыстанбұлда өткен 10-саммитінде қаланған болатын. Шешімге сәйкес, жыл сайын Түркі әлемінің бір қаласы «Мәдени астана» болып жарияланады. Шуша – осы құрметке ие болған 11-қала. Биыл мамырда «Шуша – Түркі әлемінің 2023 жылғы мәдени астанасы» жылының ресми ашылу салтанаты өтті.
ТҮРКІСТАН