Суретті түсірген – Ерлан ОМАР, «EQ»
Өңірде атқарылып жатқан ауқымды жұмыстарға тоқталған облыс әкімі Дархан Сатыбалды бұл іс-шара түркітілдес елдер арасындағы туризм бағытында қарым-қатынастарды дамытуға маңызды үлес қосатынын атап өтті. Туристерді тарту үшін жаңа ұшақ және автобус бағыттарының құрылғанын айтты.
«2021 жылы 31 наурызда Түркітілдес мемлекеттер ынтымақтастық кеңесінің VIII бейресми саммитінде тараптар Түркістанды түркі әлемінің рухани астанасы деп атау туралы декларацияға қол қойды. Бұл құжат – Түркістанның рухани-мәдени бағытта дамуына оң серпін беріп келеді. Жаңа Түркістан түркі әлемінің мәдени-рухани орталығына айналады деп сенемін», деді облыс әкімі.
Ал ТМҰ жоба директоры Ерсин Айдоған Түркістанның Түркі әлемінің туристік астанасы болып таңдалуын кейінгі уақытта салынған инвестиция мен дамудың бір көрінісі ретінде қарастыруға болатынын атап өтті.
Сондай-ақ форумда Туризм және спорт вице-министрі Ержан Еркінбаев 6 бағыт қарастырылған бастамалар мен кешенді іс-шараларды ұсынды. Атап айтқанда, біріншіден, ТМҰ-ға мүше мемлекеттер мен бақылаушы мемлекеттердің ірі қалалары арасындағы авиарейстер санының артуы қажет. Осы арада айта кетелік, «Самарқанд – Түркістан» бағытындағы алғашқы әуе маршруты іске қосылмақ. Өзбекстандық «Silk Avia» әуе компаниясының ұшағы 28 қазан күні Түркістандағы Халықаралық әуежайға алғашқы рейсін жасауды жоспарлап отыр. Жалпы, Түркі-
стан әуежайынан халықаралық Ыстанбұл мен Эль-Кувейт және еліміздің Астана, Алматы, Ақтау, Қарағанды, Ақтөбе мен Орал бағыттарында ұшақ қатынайды. Биыл қараша айында Түркістан халықаралық әуежайына «Wizz Air» компаниясының «AirBus 321» әуе рейсі қонады. Бұл Түркістан – Абу-Даби әуе бағытының алғашқы рейсі болмақ. Аталған бағыттағы рейс аптасына 3 рет қатынайды. Вице-министрдің ұсыныстарына қайта оралсақ, екіншіден, бірлескен туристік өнімдерді құру, серіктестік қатынастарды жолға қою бойынша жұмыстарды жандандыру және «Жібек жолы» заманауи туристік маршрутын дамыту маңызды. Үшіншіден, Қазақстан мен Өзбекстан арасындағы «Таббарук Зиерат» қанатқақты жобасын одан әрі жалғастыру, төртіншіден, саламатты өмір салтын насихаттау, мәдени алмасу және туристік ағымды ынталандыру мақсатында ТМҰ елдері арасында жүгіру бойынша марафондар альянсын құру ұсынылды. Бесіншіден, туризм және қонақжайлылық бойынша оқытуға мамандандырылған ТМҰ университеттер лигасын құру студенттердің кәсіби деңгейін арттыруға ықпал етеді. Алтыншыдан, елдердің туристік әлеуетін ілгерілету және маркетинг бойынша тәжірибе алмасуды күшейту қажет.
«ТМҰ кеңістігіндегі маңызды бастамалардың бірі «Түркі әлемінің туристік астанасы» екенін ерекше атап өтуге болады. Бұл бастама Ұлы Жібек жолы бойындағы қалалардың туристік әлеуетін ашуға мүмкіндік беріп, бір-бірінің мәдени және дәстүрлі құндылықтарын білу арқылы барлық түркі елдері халықтарының тығыз байланысуына ықпал етеді», деді вице-министр.
Форумға қатысушылар Қожа Ахмет Ясауи кесенесіне зиярат етіп, қаланың көрікті жерлерін аралады. Сонымен қатар ұлттық тағамдардан жасалған көрмеден көпшілікке дәм ұсынылды. Облыс өнерпаздары әннен шашу шашып, мың бұралған бишілер би биледі.
Айта кетейік, ТМҰ елдеріндегі туризм мәселелеріне жауапты министрлердің VIII отырысы аясында Түркістанды 2024 жылға арналған Түркі әлемінің астанасы деп жариялау бастамасы мақұлданған еді.
ТҮРКІСТАН