Дәстүрлі Франкфурт көрмесі шетелдегі қандастарымыз төл мәдениеті мен әдебиетімен қауышатын игі шараға айналған.
«Қазақстан баспагерлер, полиграфистер және кітап таратушылар» қауымдастығы мен «Nomad» мәдениет қорының халықаралық байланыстарын үйлестіруші Баян Қаблаштың айтуынша, көрме стендтерінің сан алуандығына қарамастан, елден жеткен сәлеммен қауышуға асыққан қандастарымыздың қуанышында шек болмады. Оларды қазақ тілінде жарыққа шыққан еліміздің тарихы, әдебиеті, табиғаты, балалар тақырыбындағы кітаптар ерекше қызықтырды.
Бұл жолы Франкфурт қаласындағы Қазақстанның Бас консулдығы «Қазақ әдебиеті мен мәдениетінің маңызына» арналған әдеби кеш ұйымдастырды.
Іс-шара барысында еліміз үшін тарихи мәні зор егемендіктің тарихы баяндалды. Осы жылдардағы жетістіктер, саяси реформалар ел дамуының келешегін айқындаса, Қазақстан мен Германия арасындағы мәдени әрі экономикалық байланыс жылдан-жылға нығайып келеді.
Әдеби кеште «Бату мен достарының алтын тостағанды іздегені» кітабы авторларының бірі, мәдениеттанушы-жазушы Зира Наурызбаймен кездесу әдеби кеш қатысушылары үшін тосынсый болды. Бүгінде шытырман оқиғалы туынды Amazon-да бірнеше рейтингте көш бастап тұр. Зира Наурызбай қандастарымызға ана тіліміздің қазіргі жағдайы, ұлтымыздың мәдени мұрасын сақтай отырып, жаһанда әрдайым қазақ болып қалудың маңызы жайында баяндап берді.
Рухани кеште «Алматы кітап баспасы» «ТopIQ.kz» электрондық оқулықтардың цифрлық платформасымен, «Steppe&World Publishing», «Атамұра», «Мазмұндама» баспаларының өкілдері қазақ диаспорасы және шетелде оқып жатқан студенттерді қазақ әдебиеті мен мәдениетіне қатысты туындыларымен таныстырды.
АЛМАТЫ
